Jaıyqta sý deńgeıi 3 metrge kóterilýi yqtımal
ORAL. QazAqparat – Jaıyq ózeniniń deńgeıi bıyl 340 santımetrge deıin kóterilýi yqtımal. Bul ótken jylǵydan bir metrge joǵary, dep habarlaıdy QazAqparat tilshisi.
BQO Tabıǵı resýrstar jáne tabıǵat paıdalanýdy retteý basqarmasynyń basshysy Rınat Sháýenovtiń brıfıngte málim etkenindeı, ózendegi sý qorynyń 80 paıyzy Reseı aýmaǵynda qalyptasady.
Ótken jyly Jaıyq ózeniniń tasý shegi tirkelgen 26 sáýir kúni Oral qalasy tusynda 240 santımetr bolǵan edi. Bıyl 5 mamyrdyń ózinde 285 santımetrge jetti.
«Reseıden alynǵan derekke qaraǵanda, Jaıyq pen onyń salasy Saqmarda tasý shegi 3 mamyr kúni boldy. Sondyqtan sýdyń 10-12 kún boıy aǵyp keletinin, Jaıyqtyń deńgeıi táýlik saıyn 7-8 santımetrge kóterilip jatqanyn eseptegende, 12-15 mamyrǵa qaraı 340 santımetrge jetedi dep otyrmyz. Basty maqsat – sý qoımalaryn barynsha toltyryp alý. Sonyń ishinde eń bastylary – Kırov, Bitik, Dóńgelek jáne Pıatımar sý qoımalary. Sosyn basqa arnalarǵa sý jiberýdi retteýge bolady. Barlyǵy 260 mln tekshe metr sý qajet bolsa, sonyń 57 paıyzy jınaldy. Qazirdiń ózinde Kırov sý qoımasy 60 paıyzǵa, 107 tekshe metr sý jınalatyn eń iri Bitik sý qoımasy 50 paıyzǵa toltyryldy. Bıyl Jaıyq ózeniniń tasýy uzaqqa sozylǵandyqtan, bul jumystar sý deńgeıi túskenge deıin jalǵasatyn bolady», - dedi R.Sháýenov.
«Qazsýshar» RMK BQO fılıalynyń dırektory Nurbolat Jumaǵalıevtiń aıtýynsha, óńirde sý tapshylyǵy máselesin sheshý jumystary jasalýda. Mysaly, Shaǵan ózeninde qaqpa ótken jyly 5-6 sáýirde jabylǵan edi. Bıyl sý tapshylyǵyna baılanysty 3 naýryzda bekitilip, mundaǵy qoımaǵa 80 paıyz sý jınaldy.
Qaraózen men Saryózenge Saratov oblysynan bıyl 57 mln tekshe metr sý alýǵa kelisimshart jasalyp, respýblıkalyq bıýdjetten qarajat bólindi. 1 mamyrdan bastap Qaraózenge sekýndyna 2 tekshe metr, Saryózenge 1 tekshe metr sý alynýda.
Sol sekildi Jánibek sýlandyrý júıesine Volgograd oblysynan 22 mln tekshe metr sý alý josparlandy. 11 mamyrdan bastap Jánibek sý sorǵy stansasy iske qosylyp, sý alý bastalady.
«Jánibek pen Bókeı ordasy aýdandaryn jaz boıy sýmen qamtý úshin 22 mln tekshe metr sý jetpeıdi, áli 6 mln tekshe metr sý qajet. Sondaı-aq Qaraózen men Saryózenge qosymsha 28 mln tekshe metr sý alý kerek. Úkimet pen mınıstrliktiń nazaryna usynylǵan bul másele sheshimin tapsa, Bókeı ordasy, Jánibek, Qaztalov, Jańaqala aýdandary sýmen qamtylady», dedi N.Jumaǵalıev.
Múmkindik bolǵan jaǵdaıda Jaıyq ózeninen Kırov-Shejin kanaly arqyly Qaraózenge sý jiberý kózdelýde. Oblysta kanaldardy tazartý jumystary da júrgizilýde.
