Jaıyqta muz oıyǵyna túsip ketken velosıpedshi qutqaryldy

ATYRAÝ. QazAqparat – Atyraýda Jaıyqtyń áli qatpaǵan muz oıyǵyna túsip ketken er adam qutqaryldy, dep habarlaıdy QazAqparat.

«Adamnyń ómirin kóshedegi beınebaqylaý kamerasynyń kómegimen qutqardy. Kameraǵa oqıǵa bolǵan sát jazylyp qalǵan.

Bul keleńsiz jaǵdaı búgin kúndiz saǵat shamamen 12:20 kezinde qala ortalyǵynda, Álıev pen Satybaldıev kóshelerin jalǵap turǵan avtokólik kópiriniń astynda bolǵan. Ózenniń ortasynda velosıpedpen kele jatqan er adam qulap, muz oıyǵyna túsip ketken. Oqıǵa ornyna shúǵyl túrde polıtsııa patrýldik ekıpajy, tótenshe jaǵdaılar departamentiniń qutqarýshylary, jedel járdem brıgadasy keldi. Qutqarýshylar men polıtsııa qyzmetkerleriniń birlesip áreket etýiniń nátıjesinde 1988 jyly týǵan er adam sýdan qutqaryldy jáne jaǵada kútip turǵan dárigerlerge tapsyryldy», - dep habarlady aımaqtyń Polıtsııa departamentiniń baspasóz qyzmetinde.

Atyraý oblysynyń Polıtsııa departamenti turǵyndar men qala qonaqtaryna Jaıyq ózenindegi muzdyń áli qatpaǵandyǵyn eskertedi. Sonymen qatar, kúndizgi ýaqytta aýa temperatýrasy jyly bolady. Polıtseıler azamattardyń óz basyn qaýip-qaterge tikpeýge, ıaǵnı ózenniń muzymen júrmeýge shaqyrady.

Avtor: A. Sokolov