Jaıyqta balyqtyń qyrylýy ózenniń ıhtıofaýnasyna qalaı áser etpek

ASTANA. QazAqparat - QR AShM Orman sharýashylyǵy jáne janýarlar dúnıesi komıteti tóraǵasynyń mindetin atqarýshy Narıman Júnisov Jaıyq ózeninde osy ýaqytqa deıin qansha tonna balyq jınalǵanyn atady, dep habarlaıdy QazAqparat tilshisi.

«2019 jyldyń 11 naýryzyndaǵy kórsetkish boıynsha 111,4 tonna balyq jınap alynyp, joıyldy. Myna máselege nazar aýdarýdy suraımyn: osy 111,4 tonna balyqtyń 103 tonnasy eki sharýashylyqta qoldan ósirilgen bekire tuqymdas balyqtar. Álbette, ol balyqtardy ósirý úshin qanshama kúsh-qaırat jumsalǵandyqtan, iri kólemdegi bekireden aıyrylyp qalý - ókinishti jaǵdaı. Alaıda osy sýǵa jiberilip ósirilgen 103 tonna balyq - qoldan ósirilgen balyqtar. Olar ózenniń tabıǵı popýlıatsııasyna tikeleı áser etpeıdi», - deıdi Narıman Júsipov Atyraý oblysymen tikeleı beınebaılanys arqyly OKQ-da ótken telekópirde.

Onyń aıtýyna qaraǵanda, sý resýrsynyń ózindik popýlıatsııasyna keler bolsaq, 2019 jyldyń 2 naýryzdan 11 naýryzyna deıin 8,6 tonna balyq jınalyp alynǵan.

«Naqty sandar týraly aıta ketsem, biz jyl saıyn ǵylymı zertteý júrgizip otyramyz. 2018 jyldyń qorytyndysy boıynsha, Atyraý oblysy aýmaǵyndaǵy Jaıyq ózeniniń ıhtıofaýnasy shamamen 21 myń tonnany kórsetken edi. Sáıkesinshe, 21 myń tonnanyń ishindegi 8 tonna balyqtyń úlesi - bar-joǵy 0,04 paıyz. Sol sebepti, bul jaǵdaı jalpy ıhtıofaýnaǵa qatty áser etti deýge bolmaıdy», - deıdi Narıman Júsipov.

Komıtet tóraǵasynyń mindetin atqarýshy óli balyqty jınaý jáne joıý jumystary áli de jalǵasyp jatqanyn tilge tıek etti.

«Óli balyqty tolyǵymen jınaý jáne joıý jumystary anyqtalǵannan keıin ǵana bul jaǵdaıdyń qandaı áseri bolǵanyn aıtýǵa bolady. Osy jyly sondaı-aq, qosymsha zertteý jumystaryn júrgizý kerek. Sonymen birge buǵan deıin aıtylǵanyndaı, Jaıyq ózeniniń túbinde óli balyqtyń kóptep tabylý jaǵdaıy tirkelgen joq», - deıdi ol.

Esterińizge sala keteıik, buǵan deıin Atyraý oblysynda balyqtyń qyrylǵany týraly birneshe aqparat jarııalaǵan bolatynbyz. Naqtyraq aıtqanda, ótken jyldyń jeltoqsan aıynyń basynda Atyraý qalasynyń syrtyndaǵy Peretask shaǵyn ózeninde balyqtardyń jappaı qyrylý oqıǵasy tirkelgen edi.

Arada apta ótpeı Atyraý oblysyndaǵy Jaıyq ózeninde balyqtardyń jappaı qyrylǵany anyqtalǵan.

Aıta keteıik, Atyraýda Jaıyq ózenin balyq ólekselerinen tazartý sharalary qolǵa alyndy.