Jaıyqta balyqtardyń qyrylý oqıǵasyn tekseretin komıssııa quryldy

ASTANA. QazAqparat - Jaıyq ózeninde balyqtardyń jappaı qyrylýyn tekseretin arnaıy komıssııa quryldy. Bul jaıynda Úkimet otyrysynan keıin QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Qazir komıssııa quryldy, ol mán-jaıdy anyqtaıtyn bolady. Komıssııanyń Aýyl sharýashylyǵy mınıstrligine qatysy bolmaıdy», - dedi Saparhan Omarov.

Buǵan deıin QR AShM Orman sharýashylyǵy jáne janýarlar álemi komıtetiniń resmı ókili Sáken Dildahmet ótken demalys kúnderi Jaıyq ózeninen 3,1 tonna óli balyq jınap alynǵanyn aıtqan bolatyn.

Onyń aıtýynsha, jınap alynǵan balyqqa jáne shyǵynǵa qatysty akti jasaldy. Qujat 2018 jyldyń jeltoqsanynda Jaıyq ózeninde balyqtardyń jappaı qyrylý faktisi boıynsha qozǵalǵan qylmystyq iske tirkeledi. Jalpy Atyraý oblystyq polıtsııa departamenti QR QK 336 jáne 328-baptary boıynsha eki qylmystyq is qozǵaǵan.