00:13, 25 Mamyr 2020 | GMT +6
Jaıyqqa shomylǵan 10 jasóspirimniń ata-anasy jaýapqa tartyldy
ATYRAÝ. QazAqparat – Atyraýda polıtseıler Jaıyqqa shomylyp júrgen jasóspirimderdi anyqtady, dep habarlaıdy QazAqparat.
Jyl mezgili boıynsha áli sýǵa shomylý maýsymy bastalǵan joq. Soǵan qaramastan Atyraýda jasóspirimder Jaıyq ózenine sýǵa túsken.
«Polıtsııa qyzmetkerleri tús kezinde Atyraý qalasyndaǵy Kaspıı yqshamaýdany men Turǵyndar qalashyǵy-Avangard shaǵynaýdandary arasynda salynǵan jaıaý kópirdiń tusynda, Jaıyq ózenine sýǵa shomylyp júrgen onǵa jýyq jasóspirimdi kórgen. Balalarynyń ózen jaǵalap, qaýipti jaıtty eskermesten, sýǵa túsip júrgeninen beıhabar ata-analar qalalyq polıtsııa basqarmasyna shaqyrtyldy.
Olarǵa qatysty QR Ákimshilik quqyq buzýshylyq týraly Kodeksiniń 364-babymen (Ortaq sý paıdalaný qaǵıdalaryn buzý) hattamalar toltyryldy», dep habarlady oblystyq polıtsııa departamentiniń baspasóz qyzmeti.
