Jaıyqqa batyp ketken 44 jastaǵy azamattyń denesi tabyldy
ATYRAÝ. QazAqparat - Atyraýda ózenge batyp ketken jigittiń denesi tabylyp, sýdan shyǵaryldy, dep habarlaıdy QazAqparat.
«Juma kúni Jaıyq ózenine batyp ketken 1976 jyly týǵan azamattyń denesi tabylyp, sýdan shyǵaryldy» dep málim etti oblystyq tótenshe jaǵdaılar departamentiniń baspasóz qyzmeti.
Eske sala keteıik, qaıǵyly oqıǵa keshe qala mańyndaǵy Aqsaı eldimekeninde bolǵan. Sol jerde 44 jastaǵy azamat Jaıyq ózeniniń shomylýǵa ruqsat berilmegen jaǵalaýynda sýǵa túsken. Ol sonda shomylyp júrip ózenge batyp ketti.
Qutqarýshylar marqumnyń denesin keshe qarańǵy túskenshe ózennen izdep, taba almaǵan bolatyn. Búgin operatsııa ári qaraı jalǵasyp, máıit tabyldy.
Atyraý oblysynyń tótenshe jaǵdaılar departamenti arnaıy jabdyqtalǵan jaǵalaýda ǵana shomylý kerektigin eske salady.
