Jaıyqqa Atyraýdaǵy sheteldikter turatyn qalashyqtyń qubyrynan sý aǵyp tur
Atyraýda Jaıyq ózeniniń jaǵalaýynda «Dostyq» qalashyǵy bar. Munda «Teńizshevroıl» kompanııasynda jumys isteıtin sheteldikter turady. Jergilikti turǵyndar ony «Amerıkalyq qalashyq» dep te ataıdy.
Atyraýlyq qoǵam belsendisi Nurlan Jýnasov Facebook-tegi paraqshasynda atalǵan qalashyqtan Jaıyq ózenine sý aǵyp turǵany týraly vıdeo júktedi.
Oblystyq ekologııa departamenti baspasóz qyzmetiniń málimetinshe, búgin, 2 tamyzda atalǵan derekke baılanysty tekserý júrgizilgen.
«Departamenttiń zerthanalyq taldamaly baqylaý bóliminiń mamandary Jaıyq ózeniniń «Amerıkalyq qalashyq» tusynan sý synamasyn aldy. «Teńizshevroıl» JShS ekologiniń túsindirýine sáıkes, atalǵan qubyr ákimshiliktiń ruqsaty negizinde Amerıkalyq qalashyqtaǵy aǵash, gazon alańyndaryn sýarý úshin tartylǵan. Qazir qysymnyń joǵarylyǵyna baılanysty qubyrdan keri qaraı Jaıyqqa tamshylap sý aǵyp tur. Alynǵan sý synamasynyń qorytyndysy aldaǵy ýaqytta qosymsha habarlanatyn bolady», - dep málim etti departamenttiń baspasóz qyzmetinen.
Eske sala ketelik, budan buryn Atyraý ekologteri tabıǵatty búldirýshilerge 7 mlrd teńgeden astam aıyppul salǵanyn jazǵan edik.
Atyraý oblystyq ekologııa departamenti basshysynyń orynbasary – bas memlkettik ekologııalyq ınspektor Syrym Tilegenovtiń málimetinshe, bıylǵy 6 aıda jospardan tys 19 tekserý júrgizilgen.
«Sot organdarynyń qaraýyna 23 ákimshilik is joldandy. Osy kezge deıin 9 is qaralyp, 7 mlrd 237 mln 547 myń 814 teńge kóleminde aıyppul salyndy», -dep málim etti Syrym Tilegenov.
Al, 40 ákimshilik is boıynsha 34 mln 836 myń 925 teńge ákimshilik aıyppul salý týraly qaýly shyǵarylyp, tolyqtaı óndirilgen.
Foto: Atyraý oblystyq ekologııa departamentiniń baspasóz qyzmeti
