Jaıyq júırigi–2022 atty BQO ashyq chempıonaty máresine jetti
Atalmysh báıgeni Bórli aýdany jáne BQO «Báıge» federatsııasy qoǵamdyq birlestigi osymen ekinshi ret uıymdastyrdy.
Báıgege Aqtóbe, Atyraý, Mańǵystaý, Qaraǵandy jáne Batys Qazaqstan oblystarynan 70-ke jýyq shabandoz qatysyp, baq synady. Aýdan turǵyndary men qonaqtary úshin aq shańqan kıiz úıler tigilip, jınalǵan jurshylyq sáıgúlikter saıysyn tamashalady.
Báıge qorytyndysynda 31 shaqyrymdyq alaman báıgede Aqtaý qalasynan kelgen Keldibaı Ibraevtyń arǵymaǵy (shabandozy Meıirjan Bısenbi) aldyna jan salmaı, bas júldeni (3 mln teńge) jeńip aldy.
Top báıgede (21 shaqyrym) qaraǵandylyq Erbol Jákeshtiń sáıgúligi (shabandozy Meıir Nurbolatov) top jardy (2 mln teńge).
Qunan báıgede (12 shaqyrym) Atyraý oblysy Jylyoı aýdanynan kelgen Aldońǵar Myrzaǵalıevtiń aty (shabandozy Álıhan Baınazar) máre syzyǵyn birinshi bolyp qıdy (1,5 mln teńge).
Alty shaqyrymdyq qoltýma taı jarysynan BQO-nyń Jańaqala aýdanynan kelgen Iman Qydyrovtyń taıy (shabandozy Aısultan Mırazat) ozyp, 1,2 mln teńgege ıe boldy.
Alty shaqyrymdyq Aqjaıyq tıpti qunan jarysynan jańaqalalyq Mahambet Esqalıevtiń qunany (shabandozy Aqat Qabylbaı), 3 shaqyrymda Syrym aýdany Qosoba aýylynan Edil Úsenovtiń taıy (shabandozy Nurjigit Jasulanuly) birinshi kelip, 1 bas qunan men jabaǵydan enshiledi.
Jeńimpazdar men júldegerler dıplom, medaldarmen, kýboktarmen, aqshalaı jáne baǵalaı syılyqtarmen marapattaldy.
Bórli aýdany ákiminiń orynbasary Aslanbek Sarqulovtyń aıtýynsha, chempıonatty ótkizýdegi maqsat – Qazaqstan Prezıdenti Joldaýynda aıtylǵan salaýatty ómir saltyn ornyqtyrý jáne buqaralyq sportty damytý baǵytyndaǵy mindetterdi oryndaý.
«Sonyń ishinde óńirde ulttyq at sporty túrlerin damytý men nasıhattaýǵa aıryqsha kóńil bólinip otyr. Báıgeniń júlde qory 18 mln teńgeni qurady. Bolashaqta Ózbekstan, Qyrǵyzstan, Reseı sııaqty elderdiń shabandozdaryn shaqyryp, báıgeni halyqaralyq deńgeıde uıymdastyrý kózdelýde», dedi QazAqparat tilshisine A.Sarqulov.
