«Jaıyq» voleıbol klýby Ulttyq lıgadaǵy alǵashqy jeńisine qol jetkizdi
ASTANA. QazAqparat – Almatyda qalasyndaǵy «Dostyq» sport kesheninde voleıboldan erlerdiń Ulttyq lıga komandalary arasynda HHHІ Qazaqstan chempıonaty birinshi týrynyń oıyndary jalǵasyp jatyr, dep habarlaıdy QazAqparat tilshisi.
Jarystyń ekinshi kúni alǵashqy bolyp Oraldyń «Jaıyǵy» men «Esil-SK» (Petropavl) klýby alańǵa shyqty.
«Jaıyq» klýby araǵa jyldar salyp, Ulttyq lıgaǵa bıyl qaıta oraldy. Kezinde QR chempıony atanǵan Oraldyń «Kondensat» komandasy 2015 jyly demeýshisiz qalyp, tarap ketken edi.
«Jaıyqty» jańa maýsymda belgili oıynshy Aleksandr Stolnıkov jattyqtyrsa, komanda Qaırat Baıbekov, Petr Chýrzın, Evgenıı Gof, Qaırat Qalenov, Aıdyn Ádilbekov sekildi negizinen Oral voleıbolynyń túlekterine úmit artyp otyr.
Keshe «Taraz» komandasymen oınaǵan oraldyqtar tartysty kezdesýde 1:3 (31:33, 27:25, 23:25, 15:25) esebimen ese jibergen edi.
Búgingi matchta «Jaıyq» shıraq oıyn órnegin kórsetip, qarsylastaryna des bermeı, 3:0 (25:17, 25:19, 25:18) esebimen jeńiske jetti.
Birinshi týr 10 qarashada márege jetedi.
Eske sala keteıik, budan buryn Almatyda erler arasynda voleıboldan el chempıonaty bastalǵanyn jazǵan bolatynbyz.
Sondaı-aq el chempıony «Atyraý» sýperkýbok ıegeri atandy.
Foto: phonoteka.org
