«Jaıyq tasyp barady jardan asyp...»-respýblıkalyq basylymdarǵa sholý
***
Batys Qazaqstan oblysy tasqyn sýdyń qursaýynan qutyla alar emes. Shaǵan jáne Derkól ózenderinde sý deńgeıiniń tómendeýi baıqalǵanymen, Oral qalasy men birqatar aýdandardyń jaǵdaıy áli de kúrdeli. Osy jaıt «Egemen Qazaqstan» gazetiniń búgingi nómirindegi «Jaıyq tasyp barady jardan asyp...» degen maqalaǵa arqaý bolǵan. «Oblys halqy birneshe kúnnen beri tabıǵı apatpen bel jazbaı kúresýde. Mekeme-uıymdardyń qyzmetkerleri men eriktiler toby qutqarýshylarǵa táýlik boıy kómek kórsetýde. Jeke kóligimen kelip adamdardy kóshirýge atsalysyp júrgender de bar. Syn saǵatta tózimdilik pen uıymshyldyq tanytqan batysqazaqstandyqtarǵa Úkimet qarjylaı qoldaý kórsetýge daıyn ekendigin málimdegen bolatyn», - dep jazady basylym.
Osy basylymnyń «Sizdi ne tolǵandyrady?» aıdarynda Májilis depýtaty Rozaqul Halmuradovtyń «Jetimderi men jesirlerin jylatpaǵan el edik» degen shaǵyn maqalasy basyldy. «Qazirgi tańda Qazaqstanda 46 myńnan astam bala túrli sebeptermen ata-ananyń qamqorlyǵynsyz qalyp otyr. Sońǵy on jyldan beri jetim balalar sheteldikterge asyrap alýǵa berilip jatyr. Resmı málimetterge qaraǵanda, alty myńnan astam bala shet el asqan, onyń 5308-i AQSh azamattarynyń úlesine tıipti. Olardyń kópshiliginiń búgingi taǵdyry ne bolyp jatqany belgisiz», - dep jazady maqala avtory.
***
«Alash aınasy» gazetiniń jazýynsha, Prezıdent N. Nazarbaev kezekten tys saılaýda qaıtadan saılanyp, soǵan oraı bılikte oryn alǵan aýys-túıisterdiń sońǵysy ári asa mańyzdy kadrlyq sheshimder keshegi Senattyń jalpy otyrysynda júzege asty. «Dese de, BUU-daǵy joǵary laýazymdy qyzmetke aýysatyny belgili bolǵan Qasym-Jomart Toqaevtyń ornyna basqa kandıdat keletini áýelden-aq túsinikti bolatyn. Sóıtip, keshe Elbasynyń usynýymen Senattyń tarıhyndaǵy besinshi tóraǵalyqtyń tizginin buǵan deıin elimizdiń Bas prokýrory qyzmetin atqaryp kelgen Qaırat Mámı ustady. Sondaı-aq, Senat otyrysynda bıliktiń barlyq deńgeıindegi kadrlyq ózgeristerge núkte qoıylyp, QR Joǵarǵy Soty men QR Bas prokýrory qyzmetine jańa basshylar taǵaıyndalsa, Ulttyq qaýipsizdik komıtetiniń burynǵy basshysy óz qyzmetine qaıta kiristi», - dep jazady basylym. Senat tórinde ótken budan da basqa bıliktegi aýys-túıister jaıynda «Senat tarıhyndaǵy besinshi tóraǵa saılandy» degen maqalada keńinen baıandalǵan.
«Búgin - ǵylym kúni. Osyǵan baılanysty keshe Bilim jáne ǵylym mınıstri Baqytjan Jumaǵulov bir top elordalyq ǵalymdarmen kezdesip, merekelik jıyn ótkizdi», - dep jazady «Alash aınasy» gazeti. Basylymnyń atap ótýinshe, elimizde ǵylymı-zertteý ýnıversıtetteri men ınstıtýttardyń róli artyp keledi. Osyǵan oraı qazirgi kezde arnaıy jumystar atqarylyp, aldaǵy ýaqytta 21 ýnıversıtetke ınnovatsııalyq dáreje berý kózdelip otyr. Ol úshin ǵylymdaǵy básekeni arttyryp, sany kóp sapasyz oqý oryndarynan arylý qajet bolady. B. Jumaǵulov osy másele boıynsha jumys istep, joǵary oqý oryndarynyń daıyndyǵyna qaraı Qazaqstanda tek 50 ýnıversıtetti ǵana qaldyrýdy josparlap otyrǵanyn atap ótti. Maqala «Ǵylym kúni qarsańynda elordalyq bir top ǵalym marapattaldy» degen taqyryppen berilgen.
***
Hokkeıden 18 jasqa deıingi Qazaqstan quramasy bıyl da álem chempıonatynyń 1-dıvızıonynda sátsiz oınady. Bul týraly «Aıqyn» gazetinde jaryq kórgen «Endigi úmit - bas quramda» degen maqalada baıandalǵan. «A» tobyndaǵy komandalardyń basyn qosqan Latvııa jerindegi básekeni Vasılıı Vasılchenko jattyqtyratyn jas hokkeıshilerimiz jap-jaqsy bastaǵan edi. Birinshi kezdesýde vengrlerden 0:2 esebimen jeńilip turyp, overtaımda bir oıynshysy kem bolǵanyna qaramastan, utyp ketken quramamyzdyń qadamyna erekshe qýanǵan edik. Biraq keıingi eki kezdesýden keıin-aq órekpigen kóńilimiz ornyna túsip, qýanyshymyz sý sepkendeı basyldy», - dep jazady basylym. Tolyǵyraq gazettiń senbilik sanynan bile alasyzdar.
Osy basylymnyń «Minber» aıdarynda «Rýhanııat» ortalyǵynyń dırektory Erbol Tileshovpen aradaǵy suhbat «Elbasy qazaq tiliniń damýyna únemi kóńil bólip keledi» degen taqyryppen berilgen. Ekeýara áńgime barysynda ol: «Biz - ǵasyrlarǵa esesi ketken halyqpyz. Orystardyń nemese aǵylshyndardyń ǵasyrlarǵa esesi ketken joq. Bizdiń dushpanǵa, jaýlaýshylarǵa esemiz ketken, tipti zamandar men dáýirlerge de esemiz ketti. Endi biz sol ǵasyrlarǵa ketken esemizdi qaıtaryp jatyrmyz. Al ony qaıtarýdyń bir amaly, odan aıyǵýdyń joly - Alash ıdeologııasyn, qazaq bolý ıdeıasyn búginge ákelip ornyqtyrý», - deıdi.
***
Keshe QR Prezıdenti N.Nazarbaevtyń shaqyrýymen elimizge resmı eki kúndik saparmen Úndistannyń Premer-Mınıstri Manmohan Sıngh keldi. Osyǵan oraı «Kazahstanskaıa pravda» basylymy búgingi nómirinde «Vremıa strategıcheskıh reshenıı» degen taqyryppen mártebeli meımanmen aradaǵy suhbatty jarııalady. Basylymnyń barlyq saýaldaryna tuşymdy jaýap bergen M.Sıngh: «Bizdiń óńirlik jáne jahandyq máselelerge kózqarastarymyz uqsas jáne biz halyqaralyq forýmdarda bir-birimizdiń bastamalarymyzǵa qoldaý kórsetip kelemiz, sonymen birge, kóptegen halyqaralyq uıymdardyń egıdasymen yntymaqtasyp jumys isteýdemiz», - deıdi.
Sondaı-aq osy suhbattyń qazaqsha nusqasyn «Egemen Qazaqstan» gazetiniń senbilik sanynan da oqı alasyzdar.
