Jaıyq ózeniniń máseleleri arnaıy komıssııada qaralady - vıtse-mınıstr E.Nysanbaev
ASTANA. 10 shilde. QazAqparat - Qazaqstan men Reseı arasyndaǵy transshekaralyq ózen-sýlardy retteý komıssııasynyń kezekti otyrysy shildeniń 23-25 kúnderi Atyraý qalasynda ótedi. Bul týraly búgin Astanada ótken jıynda QR Qorshaǵan ortany qorǵaý vıtse-mınıstri Erlan Nysanbaev málim etti.
Onyń sózine qaraǵanda, komıssııa otyrysynda Jaıyq ózeniniń ekojúıesin saqtaý men qorǵaý týraly ekijaqty kelisimsharttyń jobasy da talqyǵa salynady. «Sol jerde basqa da keńes-usynystar qaralatyn bolady», - deıdi E.Nysanbaev.
Aıta keteıik, búginde Qazaqstan men Reseı arasyndaǵy transshekaralyq ózen-sýlardy tıimdi paıdalaný máselesi eki eldiń úkimetaralyq kelisimsharty aıasynda retteledi. Oǵan sáıkes, arnaıy komıssııalar da qurylyp, Jaıyq, Esil, Tobyl men Ertis ózenderiniń sýyn qorǵaý sharalary júrgiziledi. Qazaqstannyń tarapynan osyndaı komıssııalardyń bireýin QR Qorshaǵan ortany qorǵaý vıtse-mınıstri Erlan Nysanbaev basqarady.
