Jaıyq ózeniniń Kaspıı teńizine quıar saǵasynyń tereńdigi ólshendi
ATYRAÝ. QazAqparat – Atyraýda Jaıyq ózeniniń Kaspıı teńizine quıar saǵasynyń tereńdigi ólshendi, dep habarlaıdy QazAqparat.
Atyraý oblystyq balyq sharýashylyǵy basqarmasy baspasóz qyzmetiniń málimetinshe,
arnaıy top qurylyp, Jaıyq ózeniniń Kaspıı teńizine quıar saǵasynda ólsheý jumystary
júrgizildi. Top quramyna oblystyq balyq sharýashylyǵy basqarmasynyń basshysy Artýr Sádibekuly, «Qazgıdromet» RMK Atyraý oblystyq fılıalynyń tehnık-gıdrolıgi
Fazılat Qusaıynov, oblystyq ekologııa departamentiniń bas mamany Ásıma Qaıyrjanova, balyq sharýashylyǵy salasynyń ardageri Sanat Tilepbergenov, tabıǵat
paıdalanýshy mekemeler men buqaralyq aqparat quraldarynyń ókilderi kirdi.
Maqsat – ózenniń teńizge quıar saǵasyndaǵy sý tereńdigin anyqtaý. Ólsheý jumystaryn júrgizgen top músheleri Jaıyq ózeniniń Kaspıı teńizine quıar saǵasy óte taıyz degen qorytyndyǵa jasady. Naqtylaı aıtqanda, sýdyń tereńdigi Jaıyq ózeninen 1 shaqyrym
qashyqtyqta – 1,10 metr, 800 metr jerde – 0,75 metr, 500 metr tusta – 0,71 metr, 300 metr
aýmaqta – 0,83 metr, al, teńizge quıar saǵasynda 0,43 metrdi quraǵan.
«Bul – óte tómen deńgeı. Onyń ústine, birneshe kúnnen beri teńiz jaqtan jel soǵyp tur.
Demek, teńiz sýy ózenge kelip jatyr. Sonyń ózinde ózenniń teńizge quıar saǵasy bitelip
jatyr. Al, teńiz sýy keri qaıtqanda ne bolmaq? Sondyqtan, tez arada teńiz túbin qazý
qajet. Teńizdiń ózenge quıar saǵasy tereńdetilmese, balyqtar da, kemeler de taıyz sýdan óte almaıdy. Bul sý astyndaǵy tirshilikke de, balyq kásipshligine de keri áserin tıgizedi» - deıdi Artýr Sádibekuly.
Eske sala ketelik, buǵan deıin Jaıyq ózeninen brakonerler qurǵan 12 torly aý
shyǵarylǵanyn habarlaǵan bolatynbyz .
