Jaıyq ózeniniń ekologııalyq jaǵdaıy asa qaýipti - Orynbor oblysynyń mınıstri V. Shorıkov
ASTANA. 10 shilde. QazAqparat - Búginde biz Jaıyq ózeniniń ekologııalyq jaǵdaıyn asa qaýipti dep baǵalap otyrmyz. Búgin Astanada ótken jıynda Orynbor oblysynyń syrtqy baılanystar mınıstri Vıktor Shorıkov osyndaı málimdeme jasady.
Onyń habarlaýynsha, Orynbor oblysy Reseıdiń ekologııalyq jaǵdaıy asa qıyn aımaǵyna jatady. «Bıyl atmosferaǵa shyǵarylǵan zııandy zattardyń jalpy kólemi 923,8 myń tonnany qurady. Bul ótken jylmen salystyrǵanda, 11 paıyzǵa artyq. Bizde durys tazartylmaǵan sýlar qoımalarǵa tógiledi. Sonyń saldarynan aýyz sýdyń tapshylyǵy da barynsha baıqalady. Orynbor oblysynyń basty sý arterııasy - Jaıyq ózeni de lastanyp jatyr. Biz onyń ekologııalyq jaǵdaıyn asa qaýipti dep baǵalap otyrmyz», - deıdi V. Shorıkov.
Aıta keteıik, Bashqurtstan jerinen bastaý alatyn Jaıyq ózeni Reseıdiń Chelıabi, Orynbor jáne Saratov oblystary arqyly ótip, Qazaqstannyń batys aımaqtary arqyly Kaspıı teńizine quıylady.
