Jaıyq ózeninen salmaǵy 17,5 kg bolatyn bekiretuqymdas balyq ustaldy
ATYRAÝ. QazAqparat - Jaıyq ózeninde sırek kezdesetin shoqyr balyǵy ustaldy, dep habarlaıdy QazAqparat.
«Qazirgi tańda Jaıyq ózeninde balyq qoryn saqtaýǵa baǵyttalǵan sharalar júrip jatyr. Degenmen bekiretuqymdas balyqtardy ósiretin eki zaýyt pen óndiristik kooperatıv arasynda ǵylymı maqsatta balyq aýlaýǵa bolatyndyǵy jóninde kelisim jasalǵan. Osy kelisim negizinde balyq aýlaý kezinde aýǵa salmaǵy 17,5 kg bolatyn shoqyr balyǵy tústi. Mundaı úlken balyq sońǵy 15 jyl kóleminde qolǵa túspegen. Balyq zaýyttardyń birine jiberildi»,-dep habarlady Atyraý oblystyq orman sharýashylyǵy jáne janýarlar álemi aýmaqtyq ınspektsııasynyń ókilderi.
Atyraý bekiretuqymdas balyq zaýytynda ustalǵan balyqtyń ýyldyryq shashatyn kezi kelgendigi habarlandy. Odan shamamen 5-6 kg ýyldyryq alynyp, ýyldyryqtan shamamen 200 myńnyń kóleminde shabaqtar shyǵady dep boljanyp otyr.
