Jaıyq ózeninen brakonerler qurǵan 12 torly aý shyǵaryldy
ATYRAÝ. QazAqparat – Atyraýda Jaıyq ózeninen brakonerler qurǵan 12 torly aý shyǵaryldy, dep habarlaıdy QazAqparat.
Oblystyq ekologııa departamenti Atyraý oblysynyń ekologııalyq problemalaryn keshendi sheshý jónindegi Jol kartasynyń 29, 34-tarmaqtaryn oryndaý maqsatynda Jaıyq ózenin brakonerlik aýdan tazartýdy bastady.
«Maqsat – Jol kartasynyń 29-tarmaǵynda kórsetilgendeı, Jaıyq ózeniniń jaǵasynda jumys istep turǵan hımııalyq qoımalar men basqa da lastaǵyshtardy anyqtaý, túgendeý, izdestirý, joıý jumystaryn uıymdastyrý. Sondaı-aq, 34-tarmaqqa sáıkes, Jaıyq ózeniniń arnasyn, onyń salalary men aǵymdaryn brakonerlik balyq aýlaý quraldarynan tazartý jumystaryn júrgizý. Іs-shara kezinde Jaıyq ózeninen brakonerler qurǵan 12 aýlaý quraly shyǵaryldy. Aýǵa shyrmatylǵan tiri balyqtar ózenge keri jiberildi. Al, ólgen balyqtar ıesiz aý quraldarymen birge jınap alyndy» -dep habarlady departamenttiń baspasóz qyzmeti.
Eske sala ketelik, buǵan deıin Atyraý oblysynda «Lexus LX470» kóliginen 468 keli bekire tuqymdas balyq tárkilengenin habarlaǵan edik.
