Jaıyq ózeninen bir saǵatta 1 tonna balyq aýlandy
ATYRAÝ. QazAqparat - Balyqshylar Jaıyq ózeninen bir saǵatta bir tonna balyq aýlady, dep habarlaıdy QazAqparat Atyraý oblystyq Óńirlik kommýnıkatsııalar qyzmetine silteme jasap.
Aımaq basshysy Nurlan Noǵaev shekara qyzmeti, polıtsııa, balyq sharýashylyqtary basshylarymen birge Jaıyq-Kaspıı basseıniniń jaǵalaý aýmaǵyn sholyp shyqty.
Oblys ákimi «Amangeldi» óndristik kooperatıviniń balyq aýlaıtyn ýchaskesinde balyqshylardyń jumys barysymen tanysty.
Balyqshylardyń aıtýynsha, tiri balyq az bolsa da, bar. Osy kezeń úshin bul qalypty jaǵdaı. Negizinen Jaıyqtyń jaǵasynda kezdesedi.
«Sý áli salqyn. Balyq aýlaý endi bastaldy. Biraq balyq bar ekenin kórdik. Sazan, kókserke, taban, qarakóz bar», - deıdi balyqshylar.
Atalǵan balyq aýlaý kooperatıviniń lımıti 1100 tonna. Jyl saıyn osyndaı kólemde balyq aýlanady.
Oblys ákimi Nurlan Noǵaev jańa aýlanǵan balyqtarǵa toly barjalardy qarap, aýǵa túsip jatqan balyqtar arasynda ólileri bar-joǵyn surady.
«Bul ótken jyly qys mezgilinde ólgen balyqtar. Muz erigen soń jaǵalaýǵa shyǵyp jatyr», - dep esepteıdi balyqshylar.
Bir saǵattyń ishinde aýdan 1 tonnaǵa jýyq balyq shyǵaryldy. Kóktemgi maýsym bastalǵan tórt kún ishinde 7,8 tonna balyq aýlandy.
Oblys boıynsha balyq aýlaý lımıti 4500 tonna. Óńirdegi 11 kooperatıv 14 ýchaskede osyndaı mólsherdegi lımıtti ıgeredi. Sońǵy derekter boıynsha, 13,5 tonna qara balyq aýlanǵan.
Oblys ákimi bastaǵan jumys toby Jaıyq-Atyraý bekire ósirý zaýytynyń balyq aýlaý ýchaskesine de bardy. Aımaq basshysy ózendi tazalap, balyq aýlaýǵa daıyndyq sharalary qalaı júrip jatqanyna kóz jetkizdi.
Nurlan Noǵaev ózen jaǵalaýynyń tazalyǵyna nazar aýdardy. Jaıyq jaǵasynda jatqan qoqystardy jınaýdy da umytpaý kerektigin eskertti.
Oblys ákimi qala men selolyq okrýgterdiń ákimderine, jergilikti memlekettik mekeme basshylaryna naqtyly tapsyrmalar berdi.
«Qoqys jınaý jumystaryn jedeldetý qajet. Ol úshin adam resýrstary da, kólik te jetkilikti. Sý kelip, aǵyn kúsheıgenge deıin jınap úlgerý kerek. Bul jumysqa bári jumylýy tıis. Balyq aýlaý kooperatıvteri aınalysyp jatyr. Sý kóligimen rezervat, TJ kómektesedi. Bizdiń mindetimiz qoqystardy jınap, tazalyqty qalpyna keltirý», - dedi oblys ákimi Nurlan Noǵaev.
