Jaıyq ózeninen 3,1 tonna óli balyq alyndy

ASTANA. QazAqparat - Ótken demalys kúnderi Jaıyq ózeninen 3,1 tonna óli balyq jınap alyndy. Bul jaıynda QR AShM Orman sharýashylyǵy jáne janýarlar álemi komıtetiniń resmı ókili Sáken Dildahmet Feısbýktegi paraqshasyna jazdy, dep habarlaıdy QazAqparat tilshisi.

«2019 jyldyń 7-8 naýryz kúnderi Jaıyq ózeniniń muzy erigennen keıin «Arnaıyavtobaz» JShS, Atyraý oblystyq orman sharýashylyǵy jáne janýarlar álemi aýmaqtyq ınspektsııasy, Atyraý oblystyq balyq sharýashylyǵy basqarmasy qyzmetkerleri 493 keli óli balyq jınady. 9-10 naýryz kúnderi Atyraý qalasy turǵyndarynyń kómegimen 2 621,5 keli óli balyq jınap alyndy. 2019 jyldyń 7-11 naýryzy aralyǵynda Jaıyq ózeninen jınap alynǵan óli balyqtyń jalpy salmaǵy 3,1 tonnany quraıdy», - dep jazdy ol.

Onyń jazýynsha, jınap alynǵan balyqqa jáne shyǵynǵa qatysty akti jasaldy. Qujat 2018 jyldyń jeltoqsanynda Jaıyq ózeninde balyqtardyń jappaı qyrylý faktisi boıynsha qozǵalǵan qylmystyq iske tirkeledi. Jalpy Atyraý oblystyq polıtsııa departamenti QR QK 336 jáne 328 baptary boıynsha eki qylmystyq is qozǵaǵan.

«Balyqtardyń ólý sebebi tergeý is-qımyldary aıaqtalǵannan keıin naqtylanady. 2019 jyldyń 11 naýryzyna deıin 111,2 tonna óli balyq jınap alyndy. Óli balyqtardy jınaý jmuystary jalǵasyp jatyr», - dedi Sáken Dildahmet.