Jaıyq ózenine túsip ketken eki jasóspirimdi atyraýlyq polıtseı qutqardy
ATYRAÝ. QazAqparat – Atyraýda Jaıyq ózeniniń muzy oıylyp, sýǵa túsip ketken eki jasóspirimdi polıtsııa qyzmetkeri qutqardy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, oqys oqıǵa 11 naýryzda bolǵan.
«Atyraý qalasyndaǵy Balyqshy shaǵyn aýdanynda 15 jastaǵy eki jasóspirim keshki saǵat 20:00 shamasynda Jaıyq ózeniniń muzyna túsip ketken. Olardyń kómekke shaqyrǵan daýsyn estigen tpolıtsııa kapıtany Asqar Qabdollaev jedel qutqarýǵa kirisken. Eki jasóspirimdi ázer sýdan alyp shyqqan polıtseı olardy úıine aparyp, jedel-járdem qyzmetkerlerin shaqyrtqan. Qutqarylǵan Vladımır jáne Danıldiń biri – kolledj stýdenti, ekinshisi – 8-synyp oqýshysy», - dep habarlady departamenttiń baspasóz qyzmetinen.
Dárigerlerdiń aıtýynsha, jasóspirimderdiń densaýlyǵyna tónip turǵan qaýip joq. Salqyn sýǵa túskendikten denesi tońyp qalǵan, Tıisti em-dom jasalady. Qutqarylǵan Vladımırdiń aǵasy Aleksandr Krıshnevskıı polıtsııa kapıtany Asqar Qabdollaevqa rızashylyǵyn bildirip, muny úlken erlikke balady.
Eske sala ketelik, byltyr Jaıyqtyń muzy oıylyp, ózenge túsip ketken balalardy qutqarǵan eki polıtsııa qyzmetkeri «Erligi úshin» medalimen marapattalǵan bolatyn.
