Jaıyq ózenine taǵy qortpanyń 205 myń shabaǵy jiberildi
ATYRAÝ. QazAqparat – Atyraýda Jaıyq ózenine taǵy da bekire tuqymdas balyq túrine jatatyn qortpanyń 205 myń shabaǵy jiberildi, dep habarlaıdy QazAqparat.
Oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, qortpanyń shabaqtary «Saspian Royal Fish» JShS-nyń toǵandarynda ósirilgen. Qazir atalǵan seriktestikte bekire tuqymdas balyq shabaǵyn memlekettik tapsyryspen ósirý qolǵa alynǵan. Seriktestik baǵaly balyq shabaqtaryn ósirý úshin «Jumamuratov K.E.», «Shabarov V.A.», «Samarov A.V.», «Invalıdy voıny v Afganıstane», «Mıkor», «Rozenko V.V.», «Tolqyn», «AN-grýpp», «Kolesnık S.V.», «Taýshyq aýyl sharýashylyǵy», «Batys Munaı Trans», «Isataı Opereıtıng Kompanı» jáne «Aqtaý balyq kompanı» JShS sekildi tabıǵat paıdalanýshylarmen kelisimshart jasaǵan.
«Biz óńirdegi sý aıdynyn bekire tuqymdas balyq qorymen tolyqtyrýǵa úles qosý úshin osyndaı isti qolǵa aldyq. Seriktestiktiń zaýytynda 2014 jyldan beri baǵaly balyqtyń tórt túri – orys bekiresi, súırik, qortpa men sibir bekiresi ósiriledi. Qazir bizde úsh-bes jyldyq balyqtar bar. Balyqqa qajetti jemdi Polshadan aldyramyz. Óıtkeni, basseınderdegi tuıyq sýda ósiriletin balyqqa sapaly azyq qajet. Ras, balyq jemin Qazaqstannan da, Reseıden de tabýǵa bolady. Biraq, ózimizdegi, sondaı-aq, kórshi elde shyǵarylatyn jemniń sapasy tómendeý bolyp tur» -deıdi «Saspian Royal Fish» JShS-nyń bas balyq ósirýshisi Ahat Nımatov.
Eske sala ketelik, budan buryn Atyraýda eki kúnde Jaıyq ózenine bekireniń 7 mln-ǵa jýyq shabaǵy jiberilgenin jazǵan edik.
