Jaıyq ózenine batyp ketken atyraýlyq 5 kúnnen beri tabylmaı jatyr
Oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 9 qańtarda Jaıyq ózenine batyp ketken er adamdy izdeý qaıta jalǵasqan.
Sý astynan izdeý jumystaryna jedel-qutqarý jasaǵynan 7 qutqarýshy, 1 tehnıka men 1 júzý quraly tartylǵan.
«Bıylǵy 5 qańtarda eki er adam Atyraý qalasyndaǵy Jumysker eldimekeniniń tusynda Jaıyq ózeninen balyq aýlaýǵa shyqqan. Alaıda, aýa-raıynyń qubylýyna baılanysty juqa muz oıylyp, sonyń saldarynan eki er adam ózenge túsip ketken. Onyń biri – 1974 jylǵy er adamdy polıtsııa qyzmetkerleri men tótenshelikter qutqaryp qaldy. Al, 1975 jylǵy jigitti qutqarý múmkin bolmady», -dep habarlaǵan edi departamenttiń qoǵammen baılanys toby.
Jaıyq ózenine batyp ketken adamdy izdeý 5 qańtarda bastaldy. Alaıda, búginge, 9 qańtarǵa deıin muz astyna túsip ketken adamnyń múrdesi tabylǵan joq.
«Tótenshe jaǵdaılar departamentiniń súńgýirleri 5 qańtardan beri 24 ret sý astynan izdeý jumystaryn júrgizdi. Súńgý kezinde jalpy aýdany 450 sharshy metrden astam, 4-8 metr tereńdikte sý asty tekserildi. Alaıda, súńgýirler Jaıyq ózeniniń astynda bógde zattardy kóp kezdestirgen. Ózen sýynyń laılanýyna baılanysty kórý deńgeıi tómendegen. Munyń bári súńýirlerge sý astynan izdestirý júrgizýge qıyndyq týdyryp otyr. Soǵan qaramastan súńgýirler sý astyndaǵy izdestirý-qutqarý jumystary jalǵastyryp jatyr», -dep málim etti departamenttiń qoǵammen baılanys tobynan.
Eske sala ketelik, buǵan deıin Atyraýda muz oıylyp, Jaıyqqa túsip ketken eki adamnyń bireýi qutqarylǵanyn, keıin Jaıyq ózenine batyp ketken er adam áli tabylmaǵanyn habarlaǵan edik.
Foto: Atyraý oblysy TJD