Jaıyq ózenine Atyraýdaǵy kanaldan las sý quıylyp jatyr
Bul týraly Atyraý qalasynyń turǵyny oblystyq Ekologııa departamentine komek109.kz jelisi arqyly shaǵym túsirgen. Osyǵan baılanysty departament mamandary Jaıyq ózenine Erik-Mostovoı kanalynan las sý aqqan tustan synama alǵan.
«Erik-Mostovoı kanaly shahardaǵy «Atyraý» shaǵyn aýdanynan bastalady. Qala aýmaǵy arqyly Rakýsha jáne Erkinqala aýyldarynyń qıylysy tusynan Jaıyq ózenine qosylady. Sý synamalaryn taldaý qorytyndysymen hlorıd jáne qurǵaq qaldyq kórsetkishteri ruqsat etilgen shekti shoǵyrlanýdan asý deregi anyqtaldy», - dep habarlady departamenttiń baspasóz qyzmeti.
Osyǵan baılanysty departament mamandary Atyraý qalasynyń ákimine arnaıy hat joldady. Onda Erik-Mostovoı kanalynan Jaıyq ózenine aǵyp jatqan sýdy toqtatý, kanal jaǵasyn, ishin qaldyqtardan tazalaý sharalaryn júrgizý aıtylǵan.
Bul kanaldyń uzyndyǵy – shamamen 15 shaqyrymdaı. Kanal 2000 jyldardyń basynda drenaj jobasyn iske asyrý úshin qazylǵan. Qazir qaraýsyz jatyr.
Eske sala ketelik, buǵan deıin Atyraýda káriz kollektoryndaǵy aqaýdan bir shaǵyn aýdan sýsyz qalǵanyn habarlaǵan bolatynbyz.
Atyraý qalalyq ákimdigi baspasóz qyzmetiniń málimetinshe, Balyqshy shaǵyn aýdanyndaǵy káriz kollektorynda aqaý anyqtalǵan.
«Balyqshy shaǵyn aýdanynda káriz kollektorynda aqaý shyqty. Osyǵan baılanysty atalǵan shaǵyn aýdanda 20 shildege qaraǵan túni saǵat 00:00-den tańǵy saǵat 06:00-ge deıin sý berý ýaqytsha toqtatylady», - dep habarlaǵan edi ákimdiktiń baspasóz qyzmeti.
