Jaıyq ózenine 7 mln-nan astam bekire tuqymdas balyqtyń shabaǵy jiberildi
«Bekire tuqymdas balyq túrlerin saqtaý jáne olardy turaqty paıdalanýdy retteý maqsatynda arnalǵan balyq resýrstarynyń ósimin molaıtý jónindegi memlekettik tapsyrys sheńberinde Atyraý bekire balyq ósirý zaýyty men Jaıyq-Atyraý bekire balyq ósirý zaýyty Jaıyq ózenine 7 mln asa bekire tuqymdas balyǵynyń shabaǵyn jiberdi.
2020 jylǵy memlekettik tapsyrys sheńberinde 75 mln dana qundy balyq túrleriniń shabaqtaryn tabıǵı mekendeý ortasyna jiberý kózdelip otyr», dep jazdy Ekologııa, geologııa jáne tabıǵı resýrstar mınıstrliginiń orman sharýashylyǵy men janýarlar dúnıesi komıtetiniń baspasóz hatshysy Sáken Dildahmet Facebook paraqshasynda.
Onyń aıtýynsha, jyl basynan beri respýblıkanyń sý qoımalaryna 51,5 mln-nan asa qundy balyq túrleriniń shabaqtary jiberildi, onyń ishinde 7 mln-nan astam bekire tuqymdas balyq bar. Memlekettik tapsyrysty qazan aıynda aıaqtaý josparlanyp otyr.
Eske sala ketsek, keshe Atyraýda Jaıyqqa bekire tuqymdas balyqtyń 3,6 mln-nan astam shabaǵy jiberilgen bolatyn.
