Jaıyq ózenindegi jańa kópir Aqtóbeden Astrahanǵa baratyn joldy qysqartady
ATYRAÝ. QazAqparat - Jumys saparymen Mahambet aýdanyna barǵan Atyraý oblysynyń ákimi Nurlan Noǵaev kásipkerlik pen áleýmettik saladaǵy nysandardy kórdi, dep habarlaıdy Atyraý oblystyq Óńirlik kommýnıkatsııalar qyzmeti.
Taldykól selosynda aımaq basshysy 160 oryndyq balabaqsha qurylysymen tanysty. Qurylys bıyl maýsym aıynda aıaqtalady. Alańda 50 adam jumys istep jatyr, nysan magıstraldy gaz, sý jelilerine qosylǵan. Nysandy paıdalanýǵa bergen kezde jaqyn mańdaǵy eldi mekenderdiń mektepke deıingi jastaǵy balalary balabaqshamen tolyq qamtylady.
Qurylys ornyn qaraǵan Nurlan Noǵaev qurylys normatıvteri men standarttaryn qatań saqtaýdy, tehnıkalyq qadaǵalaý mamandary tarapynan únemi baqylaý bolý kerektigin basa aıtty.
Mahambet aýdanynda aýyl sharýashylyǵy kooperatıvterin qurý jobalaryn júzege asyrý belsendi júrýde. Aýyl turǵyndary kooperatsııalardyń paıdaly tustaryn túsingen. 
-Kooperatıvter qurý damýymyzǵa mol múmkindik beredi, óndiristiń barlyq kezeńin qamtýǵa, sýbsıdııa men jeńildikter alýǵa jol ashylady,-dedi «Baqsaı» kooperatıviniń basshysy Joldas Begalıev. - Qazir kooperatıvte 35 adam bar, mal tabyny, soıý tsehy, refrıjerator bar.
Nurlan Noǵaev óz kezeginde veterınarlarǵa tseh jumysynyń qaldyqtaryn joıýdy tapsyrdy. 
-Mundaı óndiristerdi ashý aımaqtyń áleýmettik-ekonomıkalyq damýyna oń yqpal etedi. Oblystyń barlyq aýdandarynda aýyl sharýashylyǵy kooperatıvterin qurý, mal soıý tsehtaryn ashý jumystary júrip jatyr, -dedi oblys ákimi. - Biraq soıý tsehtarynyń qaldyqtaryn kádege jaratý jaıy kún tártibinde tur. Biryńǵaı algorıtm jasap, oblystyń barlyq aýdandaryna engizýimiz kerek. Mal soıý tsehtarynyń bıologııalyq qaldyqtaryn órkenıetti túrde joıyp, protsesti sanıtarlyq normalarǵa sáıkestendirýge tıispiz. 
Mahambet aýdanyna jumys saparynda Nurlan Noǵaev Aqtoǵaı selosyndaǵy 200 oryndyq mádenıet úıi qurylysyn tekserdi. Aımaq basshysy Aqtóbe-Atyraý-Astrahan avtojolynyń bóligi bolatyn Jaıyq ózeni ústindegi kópir ótkeli qurylysynyń barysymen de tanysty.
Bul kópir Aqtóbeden Astrahanǵa baratyn joldy qysqartady.
