Jaıyq ózenindegi sý deńgeıi kóterilip, saıajaılardy basýy yqtımal
ORAL. QazAqparat - Jaıyq ózenindegi sý deńgeıi kóterilse, Oral qalasy tóńiregindegi saıajaılardy basýy yqtımal. Bul týraly Batys Qazaqstan oblysynyń ákimi Altaı Kólginovtiń tóraǵalyǵymen ótken oblys ákimdigi janyndaǵy quqyqbuzýshylyqtyń aldyn alý boıynsha vedomstvoaralyq komıssııanyń otyrysynda aıtyldy, dep habarlaıdy «QazAqparat» tilshisi.
QR AShM Sý resýrstary komıteti sý resýrstaryn paıdalanýdy retteý jáne qorǵaý jónindegi Jaıyq-Kaspıı basseındik ınspektsııasynyń basshysy Ǵalıdolla Azıdýllınniń aıtýynsha, qazirgi tańda Jaıyq ózenindegi sý deńgeıiniń kóterilýi qalypty. Kúnine 80 santımetrdiń ornyna 14 santımetrge kóterilýde. Aldaǵy tórt-bes kúnde Aqtóbe oblysyndaǵy Elekten sý keledi dep boljanýda. Oǵan qosa Orynbor oblysy aýmaǵyndaǵy Jaıyqtyń taǵy bir salasy Saqmardan da kóp mólsherde sý kelmekshi. Eger ekeýinen sý bir mezette kelip qalsa, Jaıyq ózeniniń Oral qalasy tusyndaǵy deńgeıi 700 santımetrden asýy múmkin. Ondaı jaǵdaıda shahar tóńiregindegi saıajaılarǵa (1-saıajaı jáne 2-saıajaı) qaýip tónedi.
BQO TJ departamentiniń málimetine qaraǵanda, ózen mańynda 11 myńdaı adam turaqty turyp jatsa, sonyń 2,5 myńy tikeleı jaıylmalardy mekendeýde. Olardyń barlyǵyna sý tasqynynyń bolýy yqtımal ekendigi jóninde eskertildi.
Osyǵan oraı Altaı Kólginov kóktemgi sý tasqynyna baılanysty tıisti sharalardyń bárin alyp, eń aldymen turǵyndar arasynda túsinik jumystaryn aldyn ala júrgizip, olardyń qaýipsizdigin qamtamasyz etýdi, barlyq jaýapty organdarǵa kúsheıtilgen tártippen jumys jasaýdy tapsyrdy.
Komıssııa otyrysynda sondaı-aq kósheler men qoǵamdyq oryndardaǵy quqyqbuzýshylyqtyń aldyn alý boıynsha atqarylǵan jumystar jáne ózgeniń múlkin urlaý derekterin boldyrmaý baǵytynda alda turǵan mindetter de talqylandy.
Aıta keteıik, munyń aldynda óńir basshysy bastaǵan sý tasqynyna qarsy oblystyq shtab músheleri Jaıyq ózeni boıyndaǵy sý basýy múmkin jerlerdi áýe arqyly da sholyp shyqqan bolatyn. 
