Jaıyq ózeni sýynyń sapasyn tekserý nátıjesi jarııalandy
ASTANA. QazAqparat - «Qazgıdromet» RMK Jaıyq ózeninde jospardan tys sýdy saraptaý nátıjesin jarııa etti, dep habarlaıdy QazAqparat atalmysh mekemeniń saıtyna silteme jasap.
«QR Energetıka vıtse-mınıstri S.Nurlybaıdyń 2019 jylǵy 4 qańtardaǵy hattamalyq tapsyrmasyn oryndaý úshin «Qazgıdromet» RMK 2019 jylǵy 8 qańtardan bastap Jaıyq ózeniniń 13 tustamasy men ıAık, Peretaska saǵalarynda kún saıynǵy jospardan tys synama alýdy bastady», - delingen habarlamada.
Zerthanalyq taldaý jasaý sý sapasynyń negizgi ıondar, bıogendi, organıkalyq zattar men aýyr metaldardy qosa eseptegende kún saıyn 24 kórsetkishi boıynsha, apta saıyn 41 kórsetkishi boıynsha júrgizilgen.
«Joǵary (ekstremaldy joǵary) lastaný tirkelmedi», - delingen qorytyndyda.
2019 jylǵy 8-10 qańtar aralyǵyndaǵy taldaý nátıjelerin myna qosymshadan kórýge bolady.
Mamandar 2019 jylǵy 8-10 qańtar aralyǵyndaǵy Jaıyq ózeniniń 13 saǵasyndaǵy sýdyń sapasy týraly málimetti Atyraý oblysynyń ákimdigine joldady.
Eske salaıyq, Atyraý oblysynda balyqtardyń jappaı qyrylýy jeltoqsannyń basynda bastaldy. Tórt kásiporyn tekserilip, eki qylmystyq is qozǵaldy.
Sonymen qatar, «Atyraý Sý Arnasy» KMK Ekologııalyq kodekstiń talaptaryn buzǵany anyqtaldy. Tógindi sýda lastaýshy zattardyń mólsheri normatıvterden asyp ketken. Kompanııaǵa qatysty QR Ákimshilik quqyq buzýshylyq týraly kodeksiniń 328-baby boıynsha ákimshilik is qozǵaldy.
Illıýstratsııalyq foto
