Jaıyq ózeni ólgen balyqtardan tazartylyp jatyr
ATYRAÝ. QazAqparat - Atyraý oblysynda Jaıyq ózeni men jaqyn jatqan arnalarda balyqtyń qyrylýynyń jańa oshaǵy tirkelmegen, ýákiletti organdar ózendi ólgen balyqtan tazartýdy jalǵastyrýda, dep habarlaıdy QazAqparat óńirlik kommýnıkatsııalar qyzmetine silteme jasap.
Bul týraly Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy basshysynyń orynbasary Arman Moldashev habarlady.
«Áleýmettik jelide taraǵan bekire tuqymdas balyqtardyń qyrylýy týraly beıne bir apta buryn Jaıyq ózenindegi balyq sharýashylyqtarynyń birinde túsirilgen. Bul jalpyǵa belgili fakt. Búgingi kúni balyqtyń qyrylýynyń jańa faktileri tirkelgen joq. Ahýal turaqty. Qazirgi ýaqytta mamandardyń baǵalaýy boıynsha sý balyq úshin qaýipsiz. Joǵaryda atalǵan jaǵdaı boıynsha qylmystyq is tirkelip, qazirgi ýaqytta Jaıyqqa sý aǵyzatyn qurylystary bar barlyq kásiporyndarǵa jospardan tys tekserý júrgizilýde. Biz ózendi ólgen balyqtan tazartýdy jalǵastyrýdamyz», - dedi Arman Moldashev.
Qazirgi ýaqytta vedomstvoaralyq komıssııa Jaıyqta balyqtyń jappaı qyrylý sebepterin anyqtaýda. Balyqtyń qyrylý faktisi boıynsha eki qylmystyq is qozǵaldy. Mamandar jaqyn arada Jaıyq ózenine sý aǵyzatyn qurylystary bar barlyq kásiporyndardy tekseredi. Buǵan deıin Qoǵamdyq densaýlyq saqtaý departamentiniń mamandary habarlaǵandaı Jaıyq ózeniniń sýy turǵyndar úshin qaýipsiz.
