Jaıyq ózeni arqyly ótetin kópirdi jóndeý taǵy on kúnge jalǵasady (FOTO)
ORAL. QazAqparat - Oral qalasynan áýejaıǵa barar joldaǵy Jaıyq ózeni arqyly ótetin kópirdi jóndeý jumystary taǵy on kúnge jalǵasady.
Oral qalasy ákiminiń baspasóz qyzmetinen túsken málimetke qaraǵanda, atalmysh kópirdiń asfalt jamylǵysyn jóndeý jumystary 16 shildede bastalyp, alǵashqyda eki aptada aıaqtalady dep josparlanǵan bolatyn. Syrym Datuly kóshesimen jalǵasyp jatqan bul joldyń jalpy uzyndyǵy - 7,8 shaqyrym. Joba quny - 580 mln teńge.
Osy jobanyń bas merdigeri «Almatyınjstroı» AQ-nyń Oral fılıalynyń bas ınjeneri Idııat Іlııasovtyń atap ótkenindeı, kez kelgen nysandy kúrdeli jóndeý kezinde buryn beımálim bolǵan jańa aqaýlardyń anyqtalýy jıi kezdesedi. Kópirdiń eski asfalt jamylǵysyn ashý kezinde de buryn eskerilmegen kemshilikter tabyldy. Áý basta 9 deformatsııalyq jamaýdyń beseýin ǵana jóndeý kózdelse, endi tozyǵy jetýine baılanysty bárin de jóndeý qajettiligi týyndaǵan. Asfalt astyndaǵy tireýishterdiń ártúrli bıiktikte bolýy da jobaǵa ózgerister engizýdi kerek etedi. Sonymen qatar kópirden jaǵalaýǵa ıek artar tustaǵy beton plıtanyń áýpirimdep aman turǵany da qurylys jumystary kezinde baıqalypty. Endi qurylysshylar 1,5 metrlik eski plıtany uzyndyǵy 6 metrlik jańa plıtamen almastyrmaq. Osyndaı aqaýlar anyqtalýyna baılanysty qazir jobalaý uıymdary, avtorlyq jáne tehnıkalyq qadaǵalaý mekemeleri, tapsyrys berýshi sanalatyn «QPO b.v.» kompanııasynyń ókilderi men Oral qalasynyń basshylyǵy kún saıyn birneshe márte keńesip, tıisti tehnıkalyq sheshimder qabyldaý arqyly jobaǵa qajetti ózgerister engizýde.
Barynsha qysqa merzimde joldy jóndep, kólik qozǵalysyn ashý basty maqsat bolǵandyqtan, qazir qurylys qyzý qarqyn aldy. Eki aýysymda jumys atqaratyn qurylysshylar tańǵy 5-ke deıin damylsyz eńbek etýde. Óz kezeginde merdiger mekeme betonnyń qatý beriktigin 7 kún ishinde 100 paıyzǵa jetkizetin qospanyń jaqyn arada jetkiziletinin aıtady.
