Jaıyq ózeni 50 sm deıin taıyzdap ketken - senator
ATYRAÝ. QazAqparat - Senator Sársenbaı Eńsegenov Atyraý oblysyna jumys sapary barysynda jergilikti turǵyndardyń ótinishi boıynsha Jaıyq ózeniniń jaǵdaıymen tanysyp, aıdyn ahýalyn kórip qaıtty. Bul jóninde Senattyń baspasóz qyzmetine silteme jasap QazAqparat habarlaıdy.
Bul kúnderi Senat depýtattary óńirlerdi aralap, halyqtyń tynys-tirshiligimen tanysyp jatyr. Depýtattar jurtshylyqpen kezdesý barysynda aımaqtardaǵy kóptegen problemalarmen jan-jaqty tanysyp, ony sheshý joldaryn birge izdestirýde.
Inder aýdanynyń turǵyndarymen kezdesken soń Sársenbaı Eńsegenov Jaıyq ózeniniń jaǵdaıyna nazar aýdardy. Inderbor kentiniń tusynda burynǵy ótkel bermes Jaıyq ózeniniń ortasynda búginde ájeptáýir aral paıda bolǵan.
«Sýdyń azaıýynan ózenniń keı jeri 50 santımetrge deıin taıyzdap ketken. Aýdan basshylarymen birge ózenge qaıyqpen shyǵyp, arnaýly quraldarmen ólsheý jumystarynyń nátıjesinde oǵan bárimiz kýá boldyq. Jergilikti turǵyndar Jaıyqtyń eń tereń degen jeri 2 metrge de jetpeıtinin (170-180 sm) aıtyp, alańdaýshylyq bildirdi. Qaıyqtar sýdan qaıyrlap áreń shyǵady. Bul - qaýipti jaǵdaı. Elimizdiń batys ólkesindegi eń iri ózen sýynyń azaıyp ketýine Úkimet tıisti deńgeıde nazar aýdaryp, baqylaýǵa alyp, naqty shara qabyldamasa, sońy úlken ekologııalyq zardapqa ákelýi múmkin», - deıdi Sársenbaı Eńsegenov.
