Jaıyq ózeni 108 tonna óli balyqtan tazartyldy
ASTANA. QazAqparat - Jaıyn ózeninde qyrylǵan balyqtardyń jalpy salmaǵy 108,1 tonnany qurady. Bul týraly QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat.
«Áleýmettik jelide «Lýgovoı jylqy zaýyty» JShS-nyń balyq sharýashylyǵyndaǵy balyqtardyń qyrylýyna qatysty kóptegen sýret pen vıdeo materıal taraýda. Osyǵan oraı sharýashylyqty óli balyqtardan tazalaý jumystarynyń aıaqtalǵanyn túsindirgimiz keledi. Búgingi kúni Jaıyq ózeninde balyqtar ólip jatqan joq. Atyraý oblystyq orman sharýashylyǵy jáne janýarlar álemi aýmaqtyq ıspektsııasy Jaıyq ózeniniń barlyq ýchaskelerine turaqty monıtorıng júrgizýde», - dep jazdy ol.
Onyń dereginshe, 28 qańtarǵa deıin 108,1 tonna óli balyq jınap alynǵan.
«Jaıyq ózenin lastaýshyny anyqtaý boıynsha sharalar qabyldanyp jatyr. Qylmystyq aıasynda balyqtan jáne sýdan synama alyndy. Balyqtardyń qyrylý sebebi tergeý amaldary aıaqtalǵannan keıin naqtylanady», - dedi Sáken Dildahmet.
Eske sala ketsek, buǵan deıin Atyraý oblysynda balyqtyń qyrylǵany týraly birneshe aqparat taratqan bolatynbyz. Naqtyraq aıtqanda, ótken jyldyń jeltoqsan aıynyń basynda Atyraý qalasynyń syrtyndaǵy Peretask shaǵyn ózeninde balyqtardyń jappaı qyrylý oqıǵasy tirkelgen edi. Arada apta ótpeı Atyraý oblysyndaǵy Jaıyq ózeninde balyqtardyń jappaı qyrylǵany anyqtalǵan. Ókinishke qaraı, jeltoqsanda taǵy da alabuǵa, torman, qylyshbalyq sekildi qara balyqtardyń qyrylǵany týraly aqparat taratqan bolatynbyz. Osy jaǵdaıǵa baılanysty Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy balyqtyń jappaı qyrylý faktisi boıynsha qylmystyq is qozǵalatynyn jarııa etken edi.
