Jaıyq-Kaspıı basseınin batyp ketken kemeler men qaıyqtardan tazartýǵa 4,5 mıllıard teńge jumsalady - baspasózge sholý
***
Keshe Ortalyq kommýnıkatsııalar qyzmetinde bıznesti qoldaý men damytýǵa arnalǵan biregeı baǵdarlamany júzege asyrý bastalǵany jarııa boldy. Ol týraly «Báıterek» ulttyq basqarýshy holdıngi» AQ basqarýshy dırektory Qanysh Tóleýshın, «Damý» kásipkerlikti damytý qory» AQ basqarma tóraıymy Lázzat Ibragımova, atalǵan qordyń basqarýshy dırektorlary Ǵabıt Lesbekov pen Nurlan Aqshanov aıtypty. Bul jaıynda «Egemen Qazaqstan» gazetiniń senbilik sanyndaǵy «Biregeı baǵdarlamany júzege asyrý bastaldy» degen taqyryptaǵy maqalada baıandalǵan. Baǵdarlamanyń jetildirilgen sharalary jóninde áńgimelegen «Damý» qorynyń basshysy 180 mln. teńgege deıingi somadaǵy jobalardy qarjylandyrý jumystary jedeldetilgenin atap ótken. «Sózdi Úkimet qabyldaǵan jańa biregeı baǵdarlamadan bastaıyq. Bıznesti damytý men qoldaýǵa arnalǵan atalǵan baǵdarlama «Bıznestiń jol kartasy-2020» jáne basqa da birqatar salalyq baǵdarlamalardyń bazasynda jasaldy. Jańa baǵdarlama jasaýdy ótken jyly Prezıdent Úkimetke tapsyrǵan bolatyn. Ótken aıda Úkimet jańa baǵdarlama týraly qaýly qabyldady. «Damý» qory osy jańa baǵdarlamanyń qarjy agenti bolyp qala beredi», - dedi L.Ibragımova.
«Kári qurlyqty kezekti daǵdarys bulty torlady. Bútin bir qurlyqty tyǵyryqqa tiregen bul daǵdarystyń sebebi Eýropaǵa tolassyz aǵylǵan zańsyz mıgranttar tasqyny bolyp otyr. Zańsyz jolmen jer aýǵan afrıkalyqtardyń Jerorta teńizinde jıi-jıi apatqa ushyraýy jahan jurtyn alańdatyp, Eýropalyq odaqty shuǵyl sharalar qabyldaýǵa májbúrleýde», - dep jazady «Egemen Qazaqstan» gazeti «Eýropany bosqyndar basyp barady» degen taqyryptaǵy maqalasynda. Basylymnyń jazýynsha, ótken jeksenbide Jerorta teńiziniń Sıtsılııa buǵazynda 700-den astam zańsyz mıgranttar mingen keme apatqa ushyrap, teńizge batyp ketti. Osy jantúrshigerlik apat saldarynan kemege mingen adamdar túgelge derlik qaza tapty. «Tek ótken jyly ǵana Jerorta teńizi arqyly Eýropaǵa qashqan mıgranttardyń ishinen 3,5 myń adam sýǵa ketken bolatyn. Alaıda, bıylǵy jyldyń basynan beri Jerorta teńizinde oryn alǵan apattar saldarynan bolǵan qasiret ótken jylǵydan birneshe ese asyp túsetin sııaqty. Tek sáýir aıynyń ortasyna deıin teńiz arqyly kári qurlyqqa qashqan 900-den astam afrıkalyqtar mert boldy. Olardyń basym kópshiligi áıelder men balalar edi. Sáýir aıynyń sońǵy aptalarynda Jerorta teńizinde birinen keıin biri 3 úlken apat oryn aldy. Osy apattardyń saldarynan bir jumanyń ishinde ǵana 1300 mıgrant sýǵa ketti. Jerorta teńizi jaǵalaýynda jıi-jıi oryn alǵan apattar saldarynan Italııa premer-mınıstri Matteo Rentsı shuǵyl málimdeme jasap, Brıýssel qalasynda eýropalyq sammıt shaqyrylýyn talap etti», - dep jazady maqala avtory.
***
«Jaıyq-Kaspıı basseınin batyp ketken kemeler men qaıyqtardan, metall qurylǵylardan tazartady. Mundaı qaldyqtardyń jalpy salmaǵy 54 myń tonnadan asyp jyǵylady», - dep jazady «Lıter» gazeti "Gosýdarstvo potratıt 4,5 mıllıarda tenge na podem so dna Kaspııa zatonývshıh korableı" degen taqyryptaǵy maqalasynda. Basylymnyń jazýynsha, Kaspıı aıdynynda jáne onyń jaǵalaý beldeýinde áli kúnge deıin 80-nen astam keme men qaıyq jáne ártúri metall qurylǵylar jatqan kórinedi. Statıstıkalyq derekterge sáıkes, mundaı kemelerdiń bortynda munaı ónimderi, óndiristik jáne turmystyq qaldyqtar bolatyn kórinedi. Sýǵa batqan kemelerdi shyǵarý jumystary birneshe kezeńmen júrgizilmek. Jalpy jumystardy atqarýǵa 35,5 aı ýaqyt ketedi
***
«Ekspress K» gazetiniń jazýynsha, qazaqstandyq balalardy asyrap alǵan amerıkandyqtar Qaraǵandy oblysynda sý tasqynynan zardap shekken turǵyndarǵa qarjy jınaýda. Basylymnyń jazýynsha, qazaqstandyq balany asyrap alǵan amerıkandyq bylaı dep jazypty: «Bul qarjy Aqtaýda dúnıege kelgen meniń qyzym Leksıden qaraǵandylyqtarǵa arnalady». Aqsha jınaý naýqanyn qazirgi ýaqytta AQSh-ta turatyn qaraǵandylyq Vasılıı Bondarchýk pen Elena Brodkorb bastamashy bolǵan. Bul bastamany belsendiler Aınur Nurkına men Aıjan Qul-Muhammed jáne «Qazaqstandyq-Amerıkandyq qaýymdastyq» qoǵamdyq birlestigi qoldaǵan.
«On kúnniń ishinde biz 6800 dollar jınadyq. Bizdiń maqsatymyz sý tasqynynan zardap shekkenderge 10 myń dollar aýdarý», - deıdi Aınur. Maqala "I vse-takı ona vraşaetsıa" degen taqyryppen berilgen.
