Jaıyq-Kaspıı balyq sharýashylyǵy ınspektsııasy «Bekire» aktsııasynyń úılestirý shtaby bolyp belgilendi
Qazaqstannyń tabıǵat qorǵaý jáne quqyq qorǵaý organdarynyń kúsh-jigerin biriktirý kezinde 2021 jylǵy 1 sáýir men 31 mamyr aralyǵynda Atyraý, Mańǵystaý jáne Batys Qazaqstan oblystarynda keń aýqymdy «Bekire»balyq qorǵaý aktsııasy ótedi.
Esterińizge sala keteıik, jyl saıyn balyq qorǵaý sharalarynyń tıimdiligin arttyrý úshin ekologııa, geologııa jáne tabıǵı resýrstar, ishki ister mınıstrleriniń jáne QR Ulttyq qaýipsizdik komıteti tóraǵasynyń «Bekire «balyq qorǵaý aktsııasyn ótkizý týraly birlesken buıryǵyna qol qoıylady.
Balyqtardyń baǵaly túriniń ýyldyryq shashý kezeńinde balyqtardyń, onyń ishinde bekire túrleriniń ýyldyryq shashý oryndaryna kóshýin qamtamasyz etý maqsatynda zańsyz balyq aýlanýyna jáne aınalymyna qarsy is-qımyl boıynsha kúsh biriktiriledi. Osy maqsat úshin balyq qorǵaý aktsııasyn ótkizý kezinde quqyq qorǵaý jáne tabıǵat qorǵaý organdarynyń ózara is-qımyly jónindegi úılestirý shtabynyń quramy, sondaı-aq aktsııa kezindegi birlesken is-qımyl jospary bekitiledi.
Atyraý qalasynda «Bekire-2021»aktsııasyn ótkizý jónindegi úılestirý shtabynyń otyrysy kezinde aktsııa sheńberindegi josparlar týraly tolyǵyraq aıtyldy.
Ekologııa mınıstrligi Balyq sharýashylyǵy komıtetiniń tóraǵasy Narıman Júnisovtyń aıtýynsha, shtabtyń jumys organy Jaıyq-Kaspıı oblysaralyq basseındik balyq sharýashylyǵy ınspektsııasy bolyp belgilendi.
«Bıylǵy jyly negizgi kúshter Kaspıı teńiziniń jaǵalaýy men akvatorııasynda jáne Atyraý oblysynyń shegindegi Jaıyq jáne Qıǵash ózenderiniń bastaýlarynda shoǵyrlanýy tıis, óıtkeni dál sol jerlerde brakoner faktileri oryn alýy yqtımal. Balyqtyń zańsyz aınalymy faktilerin anyqtaý jáne jolyn kesý jónindegi jumysty kúsheıtý mańyzdy. Ol úshin statsıonarlyq jáne jyljymaly beketter, mobıldi reıd toptary uıymdastyrylady», - dedi komıtet basshysy.
Sonymen qatar, aktsııaǵa qatysýshylar Jaıyq ózenin aınalyp ótip, beketter men tonnalyq ýchaskelerdi tekserdi, sondaı-aq Kaspıı teńizi jaǵalaýynyń soltústik bóligin tikushaqpen aınalyp ushty.
Aıta keteıik, ótken jyldardaǵy balyq qorǵaý aktsııasynyń nátıjesi kóktemgi balyq aýlaý maýsymynda brakonerlik toptardyń qyzmeti arta túskenin kórsetedi.
Eske sala ketsek, «Bekire-2020» aktsııasynyń qorytyndysy boıynsha 759 buzýshy ákimshilik jaýapkershilikke tartylyp, 33 qylmystyq is qozǵaldy. Tártip buzýshylarǵa 13 mln teńgeden astam somaǵa ákimshilik aıyppul salyndy, zańsyz aınalymnan 13,9 tonna balyq alyndy, onyń ishinde 943,6 kg bekire tuqymdas balyq túrleri, 16,34 kg bekire tuqymdas balyq ýyldyryǵy, 439 aý, 20 qaıyq jáne 7 kólik bar.
