Jaıyq boıyndaǵy dástúrli ekspedıtsııaǵa jastar da belsene qatyspaqshy
ORAL. QazAqparat - Oraldaǵy «Eýrazııa» týrıstik-saýyqtyrý kesheninde Májilis depýtattary men Jaıyq boıymen júzetin tarıhı-mádenı ekspedıtsııasynyń turaqty qatysýshylary Batys Qazaqstan jáne Orynbor oblystary jastar birlestikteriniń ókilderimen kezdesip, atalmysh transshekaralyq ózenniń ekologııalyq jaı-kúıin talqylady.
Basqosýda Májilis depýtaty Elena Tarasenkonyń málim etkenindeı, 22 shildede bastalatyn on segizinshi birlesken qazaqstandyq-reseılik tarıhı-mádenı ekspedıtsııaǵa jastar qoǵamdyq uıymdaryn tartyp, estafetany solardyń qolyna berý oılastyrylýda. Óıtkeni árbir jastyń óz ólkesiniń tabıǵatyn bilýi aıryqsha mańyzdy. Qazir atalmysh joryqqa daıyndyq qyzý júrgizilýde.
Orynbor oblysy qurylys, kommýnaldyq jáne jol sharýashylyǵy jastar mınıstri Vıktorııa ıÝldashevanyń sózine qaraǵanda, mundaı forým ózara tájirıbe almasyp, eki aımaqqa ortaq ekologııalyq máseleni birlesip sheshý úshin kerek.
Jaıyq ózeniniń jaı-kúıin jaqsartý týraly aıtylǵanyna biraz boldy. Biraq sóz kóp te, is az. Bastaýyn Bashqurtstannan alyp, Orynbor arqyly Batys Qazaqstanǵa aǵatyn Jaıyq ózeni jyl sanap taıyzdalyp, tabıǵatynyń tynysy taryla túsýde. Eki elge ortaq másele bolǵandyqtan, ony sheshý kún tártibinde turǵanmen, áli memleketaralyq kelisimge qol jetkizilmeı otyr. Jıynda atalyp ótilgenindeı, munyń bári keshendi sheshilýi qajet.
