Jaısań — Saǵarshyn shekara beketindegi kezekte 600-den astam júk kóligi tur
AQTÓBE. KAZINFORM — Júk kóliniń 360-y shekara beketi mańynda, qalǵan 250-i Sarjansaı aýylynda tur. Keıbirinde tez buzylatyn kókónis saqtalǵan.
Aqtóbe oblystyq memlekettik kirister departamenti eksporttyq baqylaý bóliminiń basshysy Ámirjan Muhamedııarov pen oblystyq kásipkerler palatasy dırektorynyń orynbasary Rýslan Kýıshınov Qazaqstan — Reseı shekarasyndaǵy ahýaldy bildi. Jaısań — Saǵarshyn shekara beketine monıtorıng jasaǵan kezde kútý ýaqyty 24 saǵattan asyp ketkeni anyqtaldy.
— Shekaraǵa jaqyn mańda 360, Sarjansaı aýylynda 250 júk kóligi tur. Jalpy alǵanda 600-den astam kólik bar. Onyń jartysynan astamy tez buzylatyn taǵym tasymaldaıdy. Naqtylasaq Ózbekstannan Máskeýge kókónis, sonyń ishinde qarbyz, shıe tasymaldaıdy. Uzaq kútse taýardy der kezinde jetkize almaıdy, buzylyp ketse shyǵynǵa ushyraıdy. Tasymaldaýshylardyń aıtýynsha, Saǵarshyn shekara beketiniń ótkizý qabileti tómen. Bir ǵana jolaqta qabyldaıdy. Onda da jeńil jáne jolaýshylar tasymaly kóligine basymdyq berip, keıin ǵana júk kóligin ótkizedi, — dep habarlady Aqtóbe oblystyq kásipkerler palatasynyń baspasóz qyzmeti.
Bul jerde tasymaldaýshylar shekarany ózge beketten kesip óte almaıdy. Sebebi Qazaqstan terrıtorııasyn tek osy Jaısań — Saǵarshyn beketinen ótý mindettelip, qujaty toltyrylady. Sertıfıkat ta Sol — Iletsk qalasynda berilip, keıin ǵana dittegen jerine jiberiledi. Al Jaısań shekara beketi jeńil jáne júk kólikterin der kezinde ótkizip keledi.
— Kásipkerler palatasy Orynbor oblystyq kásipkerlerdiń quqyqtaryn qorǵaý ýákili V.Korshýnovqa kedergisiz ótýdi qamtamasyz etýge yqpal etýdi surady. Bul másele «Atameken» ulttyq kásipkerler palatasynyń problemalyq suraqtar reestrine de tirkeldi. Kásipkerler 1432 nómiri arqyly habarlasa alady, — dep habarlady baspasóz qyzmeti.
Vıdeodan Qazaqstan men Reseı shekarasynyń ortasyndaǵy alańda antısanıtarııalyq jaǵdaı ornaǵanyn kórýge bolady. Júrgizýshiler óz qolymen ájethana ornatyp, jan-jaǵy qoqys alańyna aınalǵan.
Buǵan deıin habarlaǵanymyzdaı, «Jaısań» shekara beketindegi kútý aımaǵy bıyl iske qosylady. Joba jyl sońyna deıin tolyq aıaqtalýy tıis.
