Ulytaý oblysynda tórt balasy bar anany pyshaqtap óltirip ketti

Ulytaý oblysynyń Jáırem kentinde 42 jastaǵy áıeldiń ólgeni týraly oqıǵa tirkeldi. Tergeý qyzmetiniń málimetinshe, qylmysqa qatysyý bolýy múmkin dep baqılyq bolǵan áıelmen birge turyp kelgen, 33 jasar seriktesi kúdikke ilinip otyr.

Marqum otbasyn ózi jalǵyz asyrap kelgen: kásippen aınalysyp, dúken ustaǵan, ári turǵyn úıdi jalǵa berip tabys taýyp kelgen. Kóz jumǵan áıeldiń tórt balasy bar, olardyń arasynda bir balasynyń múgedektigi bar.

Jaqyndarynyń aıtýynsha, er adamnyń turaqty jumysy bolmaǵan, jıi ishimdikke salynyp, qoqan-loqy tanytqan. Olardyń sózinshe, kúdikti buǵan deıin de zorlyq-zombylyq kórsetken.
Qaıǵyly oqıǵa qarsańynda áıel qarym-qatynasty toqtatýǵa sheshim qabyldaǵan, alaıda ýaqytsha onyń óz páterinde turýyna ruqsat bergen.

Aldyn ala málimet boıynsha, shabýyl kúndiz dúken ishinde bolǵan. Er adam sol jerge kelip, áıelge pyshaqpen tap bergen. Alǵan jaraqattarynyń saldarynan áıel oqıǵa ornynda kóz jumdy.

Oqıǵadan keıin kúdikti ózine qol jumsamaqshy bolǵan, alaıda aman qalǵan. Qazirgi ýaqytta ol medıtsınalyq mekemede dárigerlerdiń baqylaýynda.

Ulytaý oblystyq polıtsııa departamenti atalǵan fakti boıynsha sotqa deıingi tergep-tekserý bastalǵanyn habarlady.

— Kúdikti — marqumnyń 33 jastaǵy birge turǵan seriktesi, jergilikti turǵyn. Qylmys jasaǵannan keıin ol ózine zaqym keltirýge árekettengen, qazirgi ýaqytta medıtsınalyq mekemede jatyr, polıtsııanyń táýlik boıy kúzetinde. Sot onyń qamaýda ustaý túrindegi bultartpaý sharasyn sanktsııalady. Emdeý aıaqtalǵannan keıin kúdikti dereý tergeý ızolıatoryna qamalady. Tergeý barysy departament basshylyǵynyń erekshe baqylaýynda, — dep habarlady vedomstvo.

Atalǵan is asa qatygezdikpen jasalǵan kisi óltirý baby boıynsha tergelýde. Marqumnyń týystary istiń ádil qaralýyna úmit artyp, balalarǵa qamqorshylyq rásimdeýdi josparlap otyr.

Buǵan deıin balanyń kózinshe qos kórshisin óltirgen: Qyzylordada rezonansty is boıynsha úkim shyqqanyn habarlaǵan bolatynbyz.