Jaıma bazardaǵy «jeıdelerimniń» barlyǵy kóshirme - Ańsaǵan Mustafa
ASTANA. QazAqparat - Elimizde túrli salalardaǵy plagıat máselesi ózekti bola tústi. Óniminiń qytaılyq kóshirmeleri qaptaǵan tanymal sýretshi, ıllıýstrator Ańsaǵan Mustafanyń qazaqty naqyshtaǵy jeıdelerine bul joly qyrǵyzdar jıendik jasady, dep habarlaıdy QazAqparat.
«Papasynyń júregi dep kishkentaı balapandarǵa arnap jasap edim, buny da qyrǵyzdar mıllıon tırajben shyǵara salypty. Júregim-aı. Otyramyz ba osylaı, neýjelı aralaryńda namysy bar, myqty ıýrıst joq buny toqtata alatyn. 50h50 berem qyrǵyz, qytaı, ózbekten tartyp alǵan aqshanyń», - dep jazdy sýretshi óziniń feısbýk-paraqshasyna (Avtordyń stıli saqtaldy - red.).
Aıta keteıik, Ańsaǵan Mustafa óz sýretteri arqyly qalyń oqyrmannyń nazaryn ózekti máselelerge aýdaryp, tyń máselelerdi qozǵap keledi. Onyń qazaq jastaryna arnap salynǵan sýretteri túrik, japon, grýzın, qyrǵyz, aǵylshyn, orys jáne taǵy da basqa onshaqty tilderge aýdarylyp, álemge tarady. Sonymen qatar, Ańsaǵan Mustafa ulttyq naqyshta, ártúrli taqyrypta sýretter salynǵan óz fýtbolkalaryn ınternet arqyly saýdaǵa shyǵara bastady.
«Osyǵan deıin patent alýdy qunttamaı júre berippin. Ótken aıda qytaılyq kóshirmeler qaptap shyǵa bastaǵan soń, patentke ótinish jazdym. Ony da 9 aı kútý kerek eken, tártibi solaı. Patentim daıyn bolǵanda ǵana kóshirme jeıdelerdi Qytaıdan, Bishkekten ákelip satyp júrgen alypsatarlardysotqa bere alady ekenmin. Buryn áleýmettik taqyryptaǵy sýretterimdi qansha adam zańsyz kóshirdi, álemniń túpkir-túpkirine meniń aty-jónimsiz taraǵanda keńpeıildik tanyttym, bir adamǵa paıdasy tıip, sanasyn ózgertse qýanysh dep sanadym. Biraq, endi zańsyzdyqtarǵa toıtarys berýge shyndap kirisemin. Sebebi, bul jalǵyz meniń emes, jeıdeni ázirleıtin tutas ujymymnyń eńbegi», - dedi Ańsaǵan Mustafa QazAqparat HAA tilshisine.
Ulttyq naqyshtaǵy jeıdelerdiń avtory jaqynda salǵan sýretteriniń de kóshirmeleri de tarap úlgergenin habarlap, halyqqa kóshirme jeıdelerden saq bolýdy eskertti jáne túpnusqa men kóshirmeni ajyratý joldaryn aıtyp berdi.
«Túpnusqa jeıdelerdiń jelkesinde ansa.kz jazýy jáne matanyń quramy kórsetilgen. Al kóshirmelerde munyń bireýi de joq. Sosyn kóshirmeler bir ǵana M ólshemimen jasalady, al túpnusqada alty aılyq baladan alty XL-ge deıingi arnaıy ólshemder bar. Jeıdelerim arnaıy dúkenderde ǵana satylady, jaıma bazardaǵy taýarlardyń barlyǵy kóshirme! Halyq ony qaıdan bilsin, bazardan kóshirmeni satyp alyp kıedi de, ınstagramda maǵan rahmet aıtady. Saıtqa kirseńizder, ár óńirdegi seriktesterimniń mekenjaılary men baılanys nómirleri tur», - dedi sýretshi.
Sondaı-aq, Ańsaǵan Mustafa qazaqstandyq avtorlardyń tól týyndylaryn sheteldikter ruqsatsyz paıdalaný máselesiniń qalaı sheshiletini, qandaı jazalaý sharalary qoldanylytyny zań júzinde qarastyrylmaǵanyn aıtyp qynjyldy.
«Maǵan deıin qazaqstandyq avtorlar mundaı máselemen betpe-bet kelmegen sııaqty. Patent alsam da, sheteldik taýar óndirýshilerge bizdiń zańymyz júrmeıdi. Olardy toqtatý úshin sol eldiń patentin alýym kerek, patentin alý úshin azamattyǵyn alýym kerek. Osylaısha, tyǵyryqqa tireledi ekenmin. «Adıdas, Gýchchı sekildi álemdik alpaýyttar kóshirmeni toqtata almaı júr, olardyń qasynda sen kimsiń» degender boldy. Barymdy salyp kúresemin, tym quryǵanda kóshirmeni elge ákelgen alypsatar satýshylar jaýapqa tartylady», - deıdi sýretshi A.Mustafa.
