Jaılylyq pen jyldamdyq memlekettik qyzmettiń basty prıntsıpine aınalýy tıis – Tımýr Súleımenov

NUR-SULTAN. QazAqparat – QR Prezıdenti ákimshiligi basshysynyń birinshi orynbasary Tımýr Súleımenov memlekettik qyzmet pen qyzmetshilerdiń basty mindetin naqtylap berdi, dep habarlaıdy QazAqparat tilshisi.

«Memlekettik qyzmetshilerdiń sapalyq quramyn jaqsartý jáne kásibılendirý jumysy óte mańyzdy. Memleket basshysy memlekettik qyzmet salasyn jetildirýge qatysty birqatar naqty mindet qoıdy. Ol degenimiz kadrlardy baıqaý negizinde irikteý, merıtokratııa qaǵıdattaryn qatań saqtaý, sol sııaqty memlekettik qyzmetten bosatý protsesin jeńildetý jáne taǵy basqa. Halyqtyń memlekettik qyzmetshilerge degen senimi arta túsýi úshin jumysqa qabyldaýda irikteý kezeńi ashyq ári ádil ótýi tıis», - dedi Tımýr Súleımenov QR qyzmet isteri agenttiginiń keńeıtilgen alqa otyrysynda.

Onyń aıtýynsha, memlekettik qyzmetshi únemi izdenis ústinde bolýy kerek jáne máseleni sheshýde shuǵyl sheshim qabyldaýǵa daıyn bolǵany abzal.

«Memlekettik qyzmet salasyndaǵy taǵy bir mańyzdy jaıt jumysty avtomattandyrý, tsıfrlandyrý. Qaǵazbastylyqtyń zamany ketti, tıimdi jumys isteý nusqasyna kóshý kerek. Sondaı-aq, Prezıdent memlekettik qyzmet salasyn qaıta jańǵyrtý kerektigin basa aıtty. Jańǵyrýdy agenttik ózinen bastaǵan jón. Memlekettik qyzmetshilerdiń súıemeldeýde kóshbasshy ol - agenttik. Memlekettik qyzmetshi halyqtyń múddesine saı kelýi tıis. Memlekettik organdarǵa júgingen kezde halyq pen bıznes qamqorlyqty sezinýi tıis. Jaılylyq pen jyldamdyq memlekettik qyzmettiń basty prıntsıpine aınalýy tıis», - deıdi ol.

Sondaı-aq, ákimshilik basshysynyń orynbasary prezıdenttik jastar kadr rezervine jiti mán berý kerektigin alǵa tartty.

«Bul baǵyttaǵy jumystyń júrip jatqanynan habarym bar. Jumysty odan ári jalǵastyra otyryp talantty jastardyń el ıgiligine qyzmet etýine múmkindik jasaýymyz qajet. Bul turǵyda memleket tarapynan turaqty qoldaý bolady», - dedi T. Súleımenov.