«Jaıly mektepterdiń» syrty chehııalyq materıaldarmen qaptalatyn boldy – Albert Raý

ASTANA. QazAqparat – Amanat partııasy fraktsııasynyń halyq tabysyn arttyrý baǵdarlamasy talqylanǵan jıynda Májilis tóraǵasynyń orynbasary Albert Raý «Jaıly mektep» baǵdarlamasymen salynatyn mektepterdiń qasbet árleýshi materıldary shetelden alynatyn bolǵanyn málim etti, dep habarlaıdy QazAqparat tilshisi.

«Mádı Tákıuly, sizdi qoldaımyn. Qurylys otandyq ónimnen ǵana salyný kerek. Turǵyn úı qurylysy ǵana emes, kommýnaldyq qurylym da solaı bolýy kerek.

Qurmetti áriptester, biz keıingi 15 jyl boıy ózimizde bar dúnıeni syrttan almaý kerek dep aıta-aıta sharshadyq. Partııa fraktsııasynyń ótken jıynynda 400 mektepti («Jaıly mektep» jobasy boıynsha salynatyn – red.) otandyq ónimderden salý kerektigin aıtyp, eskertken bolatynbyz. Endi keshe ǵana Premer-Mınıstrge hat jazýǵa májbúr boldym. Qaptaýshy materıal jasaıtyn jergilikti óndirýshiler dabyl qaǵyp jatyr. Atalǵan mektepterdiń syrtyn Chehııadan ákeletin materıalmen qaptamaqshy eken. «Ózimizdiń tabıǵı, oıýmen árlengen materıalmen qaptasaq, mektepterdiń ǵımaraty nashar bola ma? Aıta-aıta shamamyz bitti. Óıtkeni múddeli emes. Óıtkeni bul munaı qasireti. Basqalaı aıtý múmkin emes», - dedi Májilis sıpkeriniń orynbasary.

Sondaı-aq, ol mundaǵy shalaǵaılyqtar úshin halyq aldynda Úkimetpen birge Amanat partııasy birge jaýap beretinin eske saldy.

«Men Belarýs elin únemi mysalǵa keltirem. Eger qarjylyq qadaǵalaýshy organ elde bar taýar men qyzmetti ımporttaýǵa jumsaǵan shyǵyn tapsa, aqsha maqsatsyz ıgerilgen dep tirkeıdi. Bizde ondaı joq. Bul joǵary aýdıtorlyq eseptiń bárine osyndaı talap jazylý kerek dep esepteımin. Al qaptaýshy materıaldarǵa kelsek, mınıstrlerge, «Samuryq-Qazynaǵa» senim joq. Biz osy jerde talqyladyq, olar bas ızep tyńdady, ana jaqqa baryp óz degenderin qasarysyp istep jatyr. Munyń bári ekonomıkalyq modeldiń durys bolmaýynan dep esepteımin. Baǵdarlamalardy iske asyramyz. Biraq odan kórsetkishter jaqsaryp jatqan joq. Taǵy da Prezıdent tapsyrmasyn oryndamaý týraly áńgimege kelip otyrmyz. Biz munaıdyń aqshasynyń kómegimen ulttyq valıýtamyzdy ustap otyrmyz. Sonyń saldarynan ımportty sýbsıdııalap otyrmyz. Osyny ózimizge túsinip alý kerek. Bul máseleden biz de shet qala almaımyz. Óıtkeni alǵash ret Parlament saılaýynda jeńgen partııa Premer-Mınıstrdiń kandıdatýrasyn usyný arqyly Úkimettiń jaýapkershiligi moınyna birge aldy. Biz ony umytpaımyz. Onyń bárine baǵany halyq beredi. Onda da bes jyldan keıin bolsa jaqsy», - dedi Albert Raý.