Jaıly mektepterdi eski, shet aýdandarǵa da salý kerek - elordalyq depýtat

ASTANA. QazAqparat – Elorda máslıhatynyń depýtaty Ashat Smaǵulov qalada jaıly mektepterdi teńdeı salý máselesin kóterdi, dep habarlaıdy QazAqparat tilshisi.

«Astanada jaıly mektepterdiń deni sol jaǵalaýda salynyp jatyr. Árıne, sol jaǵalaý bizde jańa qala. Jańa turǵyn úıler, jańa mektepter ol túsinikti. Degenmen bir sát oń jaǵalaýdy da umytpaý kerek. Jaıly mektepterdi qalanyń eski aýdandary men shet jaǵynda da salý qajet. Turǵyndarǵa teńdeı jaǵdaı jasaý kerek. Áıtpese, jańanyń barlyǵy qalanyń sol jaǵalaýynda salynady. Olaı durys emes», - dedi Ashat Smaǵulov máslıhat otyrysynda saýal joldaı otyryp.

Onyń aıtýynsha, jańa mektepter standartqa saı qalanyń oń jáne sol jaǵalaýynda teńdeı salynýy tıis.

«Jańa ǵana elimizde mektepterdiń arnaıy standartqa sáıkes salynatyny aıtyldy. Olaı bolsa qala aýdandary boıynsha da teńdiktiń bolǵany abzal. Áıtpese, «Binom» mektebindegi jaǵdaıdy kórip otyrsyzdar ǵoı. Barlyǵy balasyn «Binom»-ǵa bergisi keledi. Al qalanyń burynǵy aýdandarynda turatyn sol eski mektepterde oqyp jatyr. Eski mektepterdi buzý nemese qaıta jóndeýden ótkizý kerek. ıAǵnı ol mektepterdi jaıly mektep deńgeıine jetkizý qajet», - deıdi ol.

Aıta ketsek, búgin qalalyq máslıhattyń jalpy otyrysynda elordada «Jaıly mektep» jobasyn iske asyrý barysy qaraldy.