Jaıly mektepterde muǵalimniń baǵasynan bólek, syrtqy baǵalaý bolady

ASTANA. QazAqparat – Bıyl elimizde «Jaıly mektep» jobasy bastalady. Onyń aıasynda barlyq óńirde 400 jaıly mektep salynady. Bul týraly Oqý-aǵartý birinshi vıtse-mınıstri Sholpan Karınova aıtyp berdi, dep habarlaıdy QazAqparat tilshisi.

«Jańadan salynatyn jaıly mektepter quzyrettiliktiń ortalyǵyna aınalady dep josparlap otyrmyz. Óıtkeni, el boıynsha 400 mektep ol az emes. Olardyń qýaty óte joǵary. Jaıly mektepterdi salý nátıjesinde 842 myń oryn paıda bolady. Qazir elimizde 3,7 mln oqýshy bar. Jaıly mektepterdiń dırektorynan bastap, muǵalimderine deıin tártippen qabyldanady. Olar tıisti oqýdan ótedi. Sondaı-aq, beriletin bilim sapasyn baqylaýǵa qatysty úlken jumys isteımiz. Mektep biliminiń mazmuny bar jáne muǵalim ony baǵalaıdy. Onyń ishinde formatıvtik, sýmmatıvtik baǵalaý túrleri bar. Odan bólek, mektepishilik baqylaý bar», – dedi Sholpan Karınova «Samruk-Kazyna Construction»-da ótken «Jaıly mektep» jobasyn iske asyrý jumystaryn talqylaý barysynda.

Onyń aıtýynsha, jaıly mektepterde syrtqy baǵalaý júıesi engiziledi.

«Endi osy jerde biz syrtqy baǵalaý júıesin engizetin bolamyz. Qazaqstanda ulttyq baǵalaý júıesi quryldy. Soǵan baılanysty syrtqy baǵalaý arqyly bilim berý deńgeıin zerttep, zerdelep otyramyz. Sonda oqýshyǵa tek muǵalim qoıǵan baǵa ǵana emes, syrtqy baǵalaý arqyly bilim sapasy anyqtalady», - deıdi ol.

Buǵan deıin Sholpan Karınova elimizde salynǵanyna 70 jyldan asqan 500-den astam mekteptiń baryn aıtqan edi.