Jaıly mektepterde elektrondy kitaphana bolady

ASTANA. QazAqparat – Elimizde biliktiligi joǵary kitaphanashylardyń sany artyp keledi. Bul týraly Oqý-aǵartý mınıstrligi bıýdjettik josparlaý departamentiniń dırektory Ǵalymjan Moldash málim etti, dep habarlaıdy QazAqparat tilshisi.

«Bizdiń mınıstrlikte qaramaǵynda 8 300 kitaphanashy jumys istep jatyr. Onyń ishinde orta bilim berý uıymdarynda 6 800 kitaphanashy bar. Kitaphanashylardyń biliktiligin arttyrý boıynsha júıeli jumys júrip jatyr. Ótken jyly 632 kitaphanashy biliktiligin arttyrý kýrstarynan ótti. Bıyl 1200 mektep kitaphanashy bilim-biliktiligin arttyrady. Bul mamandardy daıarlaýda oqý baǵdarlamalaryna ózgerister engizý óte mańyzdy. Memleket basshysynyń tapsyrmasyna sáıkes, elimizde «Jaıly mektep» jobasy qolǵa alyndy. Oǵan sáıkes mektepterde elektrondy kitaphana ashý josparlanyp jatyr», - dedi Ǵalymjan Moldash «AMANAT» partııasy alańynda ótken baspasóz máslıhatynda.

Buǵan deıin kitaphanashylar men arhıv mamandarynyń jalaqysy 20% kóbeıetini týraly habarlaǵan edik.

Sondaı-aq brıfıng barysynda kitaphanashylardyń pedagog mamandyǵyn qosa meńgeretini aıtyldy.