«Jaıly mektep» jobasy: Jambyl oblysynda 13 mektep salynbaq

JAMBYL OBLYSY. QazAqparat - QR Prezıdenti Qasym-Jomart Toqaev Baızaq aýdanynda jańadan ashylǵan Kóktal orta mektebine bardy, dep habarlaıdy Aqorda.

Memleket basshysy Jambyl oblysyna jumys sapary barysynda Baızaq aýdanynyń Kóktal aýyldyq orta mektebiniń jumysymen tanysty.

Qasym-Jomart Toqaev ustazdar qaýymymen júzdesip, jańa ári jaıly mektepte bilim alyp jatqan oqýshylarǵa tabys tiledi.

«Qazaqstannyń bolashaǵy – jastar. Men jastarymyzǵa árdaıym senemin, sizderdi qoldaımyn. Ómirlerińiz jarqyn, joldaryńyz ashyq bolsyn dep tileımin», – dedi Prezıdent.

Bilim ordasynyń ǵımaraty byltyr salynyp, paıdalanýǵa berilgen. Mektep dırektory Aıat Senbekulynyń aıtýynsha, bilim ordasynda 1207 oqýshy oqıdy.

Úsh qabatty mektep ǵımaraty gazben jylytylatyn derbes qazandyqqa, ortalyqtandyrylǵan aýyzsý jelisine qosylǵan. Mektep materıaldyq-tehnıkalyq jaǵynan tolyq jabdyqtalǵan: 32 oqý kabıneti, 4 kompıýter kabıneti, 2 lıngofon kabıneti, 1 robottehnıka kabıneti, 1 sport zaly, sheberhanasy, kitaphanasy, medıtsınalyq pýnkti jáne ashanasy bar. Mektepte mańaıdaǵy aýyldardan qatynap oqıtyn balalar úshin kólik tasymaly uıymdastyrylǵan.

2023-2025 jyldary «Jaıly mektep» ulttyq jobasy aıasynda Jambyl oblysynda 9500 oryndyq 13 mektep salý josparlanyp otyr. Onyń segizi kelesi jyly paıdalanýǵa berilýge tıis.

Jalpy, Prezıdenttiń tapsyrmasymen 2023-2025 jyldary «Jaıly mektep» ulttyq jobasy aıasynda respýblıka boıynsha 800 myń oqýshyǵa arnalǵan 400-den astam jaıly mektep salynady.

Foto: akorda.kz