«Jaıly mektep» jobasy nege «Samuryq-Qazyna» qoryna berildi

ASTANA. QazAqparat – «Samruk-Kazyna Construction» AQ basqarma tóraǵasy Máýlen Aımanbetov «Jaıly mektep» ulttyq jobasy nege ózderine berilgenin túsindirdi, dep habarlaıdy QazAqparat tilshisi.

«Ártúrli áńgimeler shyqty. «Jaıly mektep» ulttyq jobasy nege «Samuryq Qazynaǵa» berilip otyr? Nege ákimdikter istemeıdi?» dep surap jatyr. Prezıdent Qasym-Jomart Kemelulynyń tapsyrmasynda aıtyldy. Úsh jyldyń ishinde mektep tapshylyǵyn, úsh aýysymdy oqytý júıesin joıý kerek. Aýyldy jerlerdiń bárinde dárethana dalada. Kórip otyrsyzdar, zorlyq jasalyp jatyr. Úlken synyptaǵylar syrttaǵy ájethanada kishilerge zábir kórsetedi. Osy sııaqty jaǵymsyz is-áreketter kóbeıip ketti. Osynyń bárin qysqa merzimde salý, árıne, tek EPC platformasynda («Injınırıng-Satyp alý-Qurylys» qaǵıdaty – red.) ǵana múmkin. Sol sebepten biz osyny Oqý-aǵartý mınıstrligine, mınıstrlik Úkimetke, Úkimet Prezıdent ákimshiligen jetkizip, byltyr 28 qyrkúıekte sheshim shyqty», - dedi ol BAQ ókilderimen ótken brıfıngide.

Spıkerdiń aıtýynsha, jobany iske asyrýdyń 8 tásili qarastyrylǵan.

«Bul platformada jumystyń 8 tásili boldy. Sonyń ishinde tapsyrys berýshiniń fýnktsııasy jergilikti ákimdikterden bizge berildi. Ádette jobalaýdyń ózi bir jyldan asyp ketedi. Sottasyp jatsa, odan da uzap ketedi. Bul platformada ondaı bolmaıdy. Jobalaýǵa ár kezeńde sarapshylar kómektesip otyrady», - dedi Máýlen Aımanbetov.