Jaıly mektep jobasy aıasynda Qostanaı oblysynda 8 nysan salynady
QOSTANAI. QazAqparat – «Jaıly mektep» ulttyq jobasy boıynsha Qostanaı oblysynda 7 200 oqýshyǵa arnalǵan 8 mektep salynady. Bul týraly óńir ákimi Arhımed Muhambetov óziniń áleýmettik jelidegi resmı paraqshasynda jazdy, dep habarlaıdy QazAqparat tilshisi.
«Oblysta sapaly bilim berý ortasyn qurý úshin barlyq qajetti sharalar qabyldanyp jatyr. Jańa zamanaýı mektepter salynady. Mysaly, kelesi jyly oblys ortalyǵynyń 2 shaǵyn aýdanynda oqýshylarǵa jańa mektepter ashylady.
«Jaıly mektep» jobasy aıasynda 2025 jylǵa deıin Qostanaı, Rýdnyı, Arqalyq, Tobyl qalalarynda, Zarechnyı jáne Qusmuryn kentinde 7 200 oryndyq taǵy 8 jańa mektep salý josparlanǵan», - dep jazdy oblys ákimi Іnstagram-daǵy paraqshasynda.
Aıta keteıik, Oqý-aǵartý mınıstrliginiń dereginshe, qazirgi tańda Qostanaı oblysynda 2 436 oqýshy orny tapshy. Al, jalpy bilim oshaqtaryndaǵy oryn jetispeýshiligi boıynsha Astana, Almaty jáne Shymkent qalalary men Túrkistan, Almaty oblystary kósh bastap tur.
