«Jaıly mektep» jáne «Aýyldyq densaýlyq saqtaý salasyn jańǵyrtý» jobalaryna 2,8 trln teńge bólinedi

ASTANA. QazAqparat – QR Parlamenti Senatynyń tóraǵasy Máýlen Áshimbaev «Tıimdi óńirlik saıasat – elimizdiń ornyqty áleýmettik-ekonomıkalyq damýynyń negizi» taqyrybyndaǵy Parlamenttik tyńdaýda «Jaıly mektep» jáne «Aýyldyq densaýlyq saqtaý salasyn jańǵyrtý» jobalaryna 2,8 trln teńge bólinetinin aıtty, dep habarlaıdy QazAqparat tilshisi.

«Máselelerdiń kelesi blogy óńirlerdegi áleýmettik ınfraqurylymdy damytýmen baılanysty. Bilim berý salasy úshin mektep tapshylyǵy mańyzdy másele bolyp tur. Túrkistan jáne Almaty oblystarynda, sondaı-aq Astana, Almaty jáne Shymkentte jaǵdaı kúrdeli. Jumys istep turǵan 700-den astam mektep ábden tozǵan. Olardyń tórtten biri paıdalaný merzimi 70 jyldan asyp ketken ǵımaratta ornalasqan», - dedi Máýlen Áshimbaev.

Senat tóraǵasy ınfraqurylymnyń tozý problemasy densaýlyq saqtaý salasyna da tán ekenin eske saldy.

«Qoldanystaǵy aýdandyq aýrýhanalar mamandandyrylǵan medıtsınalyq kómek kórsete almaıdy. Naýqastar iri qalalarǵa barýǵa májbúr. Aýyldarda jaǵdaı túrli mamandardyń tapshylyǵymen kúrdelenip otyr. Osy máselelerdi sheshý úshin Memleket basshysynyń bastamasymen «Jaıly mektep» jáne «Aýyldaǵy densaýlyq saqtaý salasyn jańǵyrtý» sııaqty eki pılottyq ulttyq joba qabyldandy. Bul maqsattarǵa 2,8 trıllıonnan astam teńge qarastyrylǵan.

2026 jylǵa deıin keminde 800 myń oqýshy ornyn salý kózdelip otyr. Sondaı-aq 655 alǵashqy medıtsınalyq-sanıtarlyq kómek nysany jáne 32 kópsalaly ortalyq aýdandyq aýrýhana salynýy tıis. Senat depýtattary bul jumysty baqylaýda ustaıdy», - dedi ol.