Jaıly mektep: eki jylda jańa formattaǵy 369 mektep salynady

ASTANA. QazAqparat – «Jaıly mektep» ulttyq jobasy aıasynda eki jylda jańa formattaǵy 369 mektep salynady. Bul týraly búgin Úkimette Premer-Mınıstrdiń birinshi orynbasary Roman Sklıardyń tóraǵalyǵymen ótken keńeste aıtyldy, dep habarlaıdy QazAqparat Úkimet saıtyna silteme jasap.

Memleket basshysynyń tapsyrmasy boıynsha «Jaıly mektep» ulttyq jobasy júzege asyrylyp keledi, onyń sheńberinde 2024-2025 jyldary 740 myń oqýshyǵa arnalǵan, jańa formattaǵy 369 mektep salynady.

Búginde bilim berý mekemelerin tehnologııamen jaraqtandyrý standarttaryn jasaý boıynsha jumys júrgizildi. Aldyn ala jasalǵan tizimde jıhaz, kórneki quraldar, oqý, kompıýterlik, mýzykalyq, ınteraktıvti jáne sporttyq jabdyqtar qarastyrylǵan. Aıta ketý kerek, «Atameken» UKP-men birlesip otandyq taýar óndirýshilerdiń ulttyq jobaǵa qatysý máselesi pysyqtalǵan.

Jańa mektepter jeti túrli bolady: 300, 600, 900, 1200, 1500, 2000 jáne 2500 oryndyq. Qazirgi ýaqytta mektepterdiń qýattylyǵy boıynsha foreskızdik jobalary, kólemdik josparlaý sheshimderi «Memsaraptama» RMK-men aldyn ala kelisilip, tıisti jumystardy júrgizý úshin barlyq óńirlerge jiberilgen.

«Jaıly mektep» ulttyq jobasyn iske asyrý apatty jaǵdaıdaǵy, úshaýysymdy jáne oryn tapshy mektepter máselelerin sheshýge, sondaı-aq bilim sapasyn arttyrýǵa jáne oqý úshin qolaıly jaǵdaı jasaýǵa múmkindik beredi.