«Jaıly mektep» aýyldyq jerlerde de salynbaq
«Bıyl «Jaıly mektep» ulttyq jobasyn iske asyrý bastalady. Osylaısha úsh aýysym máselesi sheshimin taýyp, mektepterdegi oryn tapshylyǵyn joıý múmkindigi týady. Elimizde qazirdiń ózinde 225 myńǵa jýyq oqýshyǵa oryn jetpeıdi. Jaıly mektepter 2025 jyldyń sońyna deıin qalalarmen qatar shalǵaıdaǵy eldi mekenderde de salynady. Qurylysqa otandyq óndiris materıaldary qoldanylady», - dedi «Samruk-Kazyna Construction» AQ basqarma tóraǵasy Máýlen Aımanbetov «Jaıly mektep» jobasyn iske asyrýdy talqylaý barysynda.
Onyń aıtýynsha, jaıly mektepter jobasy qoldanystaǵy normalar men ozyq halyqaralyq tájirıbege negizdelip ázirlendi.
Sondaı-aq, spıker jańa mektepterde sport zaldar men kovorkıng alańy bolatynyn aıtty. Búginde mektep salatyn merdiger kompanııalarǵa qoıylatyn talaptar belgilendi.
«2025 jylǵa qaraı el aýmaǵynda 842 myń oryndyq 401 jaıly mektep ashý josparlanýda. Ol mektepterdegi oryndardyń sany 300-den bastalyp 2500-ge deıin jetedi. ıAǵnı oqýshylardyń sanyna qaraı belgilenedi. Jaıly mektepte robototehnıka kabıneti, birneshe zerthana, aýmaǵy 88 sharshy metr bolatyn horeografııa zaly, úsh kovorkıng alańy bolýy kerek. Sondaı-aq mektepterde bastaýysh, orta býyn jáne joǵarǵy synyp oqýshylary úshin bólek sport zal bolady. Odan bólek, ár synypta ınteraktıv taqta jáne muǵalimge arnalǵan kompıýter qarastyrylǵan», - deıdi ol.
Eske salaıyq, Qazaqstanda «Jaıly mektep» ulttyq jobasyn ázirleý byltyr qolǵa alyndy. Ulttyq jobanyń biryńǵaı operatory – Samruk-Kazyna Construction kompanııasy.
