Jaıly mektep: Atyraý oblysyndaǵy Saǵyz aýylynda jańa bilim ordasy salynady
Qyzylqoǵa aýdany ákimdiginiń málimetinshe, turǵyny kóp eldiń mekenniń qatarynda Saǵyz aýyldyq okrýgi bar. Qazir okrýgte 8300 turǵyn tirkelgen. Okrýgte turǵyndar sany jyl saıyn ósip otyr. Aýyldaǵy úsh orta mektepte oqýshylar kóbeıip, orynnyń jetispeýshiligi baıqalǵan.
Sondaı-aq, munda Qyzylqoǵa agrarlyq-tehnıkalyq kolledji, 2 balabaqsha men 1 dárigerlik ambýlatorııa, mádenıet úıi jumys isteıdi.
«Aýyl turǵyndary mektepterdegi oryn jetispeýshiligin oblys, aýdan ákimderimen kezdesýde jıi kóteredi. Jaqynda oblys ákimi Serik Shápkenov Saǵyz okrýginiń turǵyndarymen kezdesýde jańa mekteptiń salynatynyn málim etti. Soǵan oraı aýylda 600 oryndyq jańa mektepti salý 2024-2025 jyldarǵa josparlanyp otyr. Atalǵan mekteptiń qurylysy «Jaıly mektep» baǵdarlamasy boıynsha «Samuryq-Qazyna» qory arqyly salynady», -dep habarlady aýdandyq qurylys, sáýlet, jáne qala qurylysy bóliminiń basshysy Dýlat Nyǵmetov.
Onyń aıtýynsha, qazir jańa mekteptiń qurylysyn júrgizý úshin Saǵyz aýylynan jer telimi bólingen. Qurylys nysanynyń bastapqy qujattary ázirlengen. Al, jobalaý jumystaryn jyl sońyna deıin daıyndaý kózdelip otyr.
Eske sala ketelik, buǵan deıin jastary jıi tóbelesetin Saǵyz aýylynda 50 beınekamera ornatylatynyn jazǵan edik.
Oblys ákimi Serik Shápkenovtiń málimetinshe, bıyl Saǵyz aýylynda qaýipsizdik pen qoǵamdyq tártipti qamtamasyz etý úshin 50 beınebaqylaý kamerasy ornatylady. Polıtsııa bólimshesiniń jańa ǵımaratyn salý josparlanǵan.
