Jaıly mektep: Almatyda ulttyq joba aıasyndaǵy barlyq mektep biryńǵaı standartpen salynady
Almaty turǵyndarynyń sany jyl saıyn ósip jatyr. Sonyń 60 paıyzy kóshi-qon esebinen júzege asady. Bul týraly Memleket basshysy byltyr qala jurtshylyǵymen kezdesý barysynda aıtqan edi.
«Bul jaǵdaı qalanyń áleýmettik ınfraqurylymyna eleýli áser etedi. Qazir qaladaǵy balabaqshalarda 19 myńnan astam oryn jetpeıdi. Bul tapshylyqty azaıtý úshin memlekettik jáne jekemenshik balabaqshalar salý kerek. Sondaı-aq, balalardy memlekettik bilim tapsyrysy arqyly mektepke deıingi jeke bilim berý mekemelerine ornalastyrý qajet. Ákimdikke 3-ten 6 jasqa deıingi balalardyń 97 paıyzyn mektepke deıingi bilimmen qamtýdy tapsyramyn. Bul mindetti 2025 jylǵa deıin oryndaý kerek. Oqýshylardyń sany jyl saıyn orta eseppen 12-15 myńǵa artyp keledi. Sol sebepti, mektepterde oryn tapshylyǵy joǵary. Qazir 29 myńnan astam oqýshyǵa oryn jetpeıdi. Bul ahýal oqýshylardyń sapaly bilim alýyna keri áser etedi. Meniń tapsyrmammen Almatyda aldaǵy eki jyl ishinde «Jaıly mektep» jobasymen 37 myń oryndyq 22 mektep salynady. Basty mindet – 2030 jylǵa qaraı bir aýysymmen oqytýǵa tolyq kóshý», - dedi Qasym-Jomart Toqaev.
Almaty ákimdiginiń málimetinshe, megapolıste «Jaıly mektep» ulttyq jobasy boıynsha qurylys qyrkúıek aıynda bastalady. Qazir ınjenerlik ınfraqurylymdy eskere otyryp, jobalar daıyndalyp jatyr. Sodan keıin jerdi satyp alý jumystary aıaqtalady. Qurylys eki jolmen júzege asady: Samruk-Kazyna Construction biryńǵaı operatory arqyly, ol el boıynsha mektepterdi tıpteýdi qamtamasyz etedi. Memlekettik formadan basqa, baǵdarlama boıynsha jumys isteýge daıyn jeke kompanııalar bar. Olar óz ýchaskelerinde mektepter salady, sodan keıin olardy tıisti túrde qalaǵa beredi. Almatyda osy baǵdarlama aıasynda josparlanǵan 22 mekteptiń 15-i Samruk-Kazyna Construction jelisi boıynsha, 7 mektep jeke ınvestorlardyń kúshimen salynady.
Almaty qalasy ákimdiginiń jobalyq keńsesinen atap ótkendeı, jańa formattaǵy mektepterdiń kópshiligi Alataý, Naýryzbaı aýdandarynyń árqaısysynda – 5, Bostandyq aýdanynda – 4, Túrksib aýdanynda – 3, Áýezov aýdanynda – 2, qalǵan aýdandarda bir-birden mektep salý kózdelgen.
«Mektepter olardyń tapshylyǵy baıqalatyn mekenderde salynady. Qazirgi ýaqytta jobalyq-smetalyq qujattardy ázirleý jumystary júrgizilip jatyr. Mektepterdiń qurylysy 2023 jyldyń qarashasynda saraptamadan ótken soń bastalady. Sondaı-aq, aǵymdaǵy kezeńde qala ákimdigi men birqatar aýdandardaǵy jer telimderiniń ıeleri arasynda segiz mektep «tolyq qurylys» júıesi boıynsha salynyp, odan ári paıdalanýǵa berý týraly memorandýmǵa qol qoıý jumystary júrgizilip jatyr», - dep habarlady Almaty qalasy ákimdiginiń jobalyq keńsesi.
Osylaısha «Jaıly mektep» ulttyq jobasy aıasyndaǵy barlyq mektepter biryńǵaı standart boıynsha salynady. Bul rette mektepterge qajetti barlyq materıaldar, qural-jabdyqtar, tipti jıhazdar da qazaqstandyq óndiristen bolmaq.
«Jaıly mektepterde erekshe bilim berý qajettilikteri bar balalarǵa da qolaıly jaǵdaı jasalady, joǵary jyldamdyqty ınternet júrgiziledi jáne bastaýysh synyp oqýshylary, joǵary synyp oqýshylary úshin bólek kireberister, sondaı-aq bólek sport zaldary, ashanalar ornatylady. Eń bastysy, mektepterde Face ID jáne QR-kodtardy qosa alǵanda, esikterdi avtomatty túrde qulyptaýmen kirý jáne shyǵýdy baqylaý júıesin engizý josparlanǵan. Mektep ákimshiligi búkil ǵımarat pen mektep aýmaǵyndaǵy jaǵdaıdy naqty rejımde qadaǵalap otyrýy úshin mindetti túrde beınebaqylaý júrgiziletin bolady», - dep málim etti Almaty ákimdiginen.
Aıta keteıik, «Jaıly mektep» ulttyq jobasyn Úkimet 2022 jyly Prezıdenttiń «Ádil memleket. Birtutas ult. Gúldengen qoǵam» joldaýyn iske asyrý aıasynda qabyldady. Jobanyń basty maqsaty – apatty nysandardy, úsh aýysymdy oqytýdy jáne orta bilim berý uıymdaryndaǵy oqýshy oryndarynyń tapshylyǵyn joıý. Respýblıka boıynsha aldaǵy 2 jylda 401 mektep salý josparda. Ulttyq jobanyń operatory – «Samruk-Kazyna Construction»AQ.
