Jaıly mektepterge Qazaqstanda jasalǵan ónimderdi satyp alýymyz kerek — Oljas Bektenov
ASTANA. KAZINFORM — Premer-Mınıstr Oljas Bektenov «Samuryq-Qazyna» qorynyń jaıly mektepter qurylysynyń kesheýildeýine qatysty dáıekterin qabyldamady.
«Nurlan Qarshyǵauly («Samuryq-Qazyna» AQ basqarma tóraǵasy Nurlan Jaqypov), siz baıandamańyzda jobalyq-smetalyq qujattamany bekitý jumysy keshiktirilip jatqanyn aıttyńyz. Sebepterin de toqtaldyńyz. Biraq olar qabyldanbaıdy. Jumysty barynsha tezdetip, barlyq jumys merziminde aıaqtaý kerek. Ekinshiden, kásipkerler tarapynan «Samuryq-Qazyna Konstrakshn» kompanııasynyń jumysyna qatysty kóptegen shaǵym túsip jatyr. Qurylys materıaldaryn, tehnologııalyq jabdyqtar men jıhazdar satyp alý isinde ózimizdiń otandyq óndirýshilerdi qatysýy boıynsha shekteýler bolyp otyr degen aqparat maǵan túsip jatyr. Bul problemany sheshý úshin qandaı jumys istelip jatyr?», — dedi Oljas Bektenov búgin Úkimet otyrysynda.
Nurlan Jaqypovtyń aıtýynsha, jobalyq-smetalyq qujattamany ázirleý kezinde otandyq taýar óndirýshilerdiń ónimderin barynsha paıdalanylady. Mysaly, Almaty oblysy Qarasaı aýdany Eltaı aýylynda 1200 oryndyq mektep salý jobasynda jergilikti qamtý deńgeıi — 60 paıyz. Sondaı-aq Túrkistan oblysy Jańaqala shaǵyn aýdanynda 2000 oryndyq mektep salý jobasynda jergilikti qamtý deńgeıi — 71 paıyz.
«Biz «Atameken» UKP jáne ákimdiktermen tıisti jumysty júrgizip jatyrmyz. Óńirlerde arnaıy jıhaz komıssııalary quryldy», — dedi ol.
Sonymen qatar Nurlan Jaqypov «Atameken» talaptarǵa sáıkes keletin otandyq óndirýshilerdiń tizimin qalyptastyrýy kerektigin atap ótti. Olardy qoldaý úshin qajetti quraldar Úkimettiń qaýly jobasyn iske asyrý kezinde qoldanylmaq.
«Osyndaı kemshilikterge jol berilmeýi kerek. Ulttyq jobaǵa tek Qazaqstanda jasalǵan ónimderdi satyp alýymyz kerek», — dedi atap ótti osy oraıdy Oljas Bektenov.
