Jaıly mektepterdi basqarýdyń júıesine qatysty qujattarǵa ózgeris engiziledi

ASTANA. KAZINFORM – QR Oqý-aǵartý mınıstriligi jaıly mektepterdi basqarý júıesine qatysty túsinik berdi. 

«Qazirgi kezde mınıstrlik tıisti jumys tobyn quryp, atalǵan másele boıynsha jumystardy iske asyryp jatyr. Jaıly mektepterdi basqarýdyń arnaıy júıesi boıynsha usynystar talqylanyp, tıisti qujattarǵa ózgerister engiziledi», - delingen Oqý-aǵartý mınıstriliginiń Kazinform agenttigine bergen jaýabynda. 

Sonymen qatar vedomstvo ákimdiktermen birlesip 1 300 mektepti rekonstrýktsııalaý máselesin pysyqtap jatqanyn habarlady.

«Jyl sońyna deıin mektepterdiń tizimin jáne atqarylatyn jumystardyń tizbesin aıqyndaý josparlanǵan», - dep naqtylady mınıstrlik. 

Eske salsaq, bıylǵy Joldaýda Memleket basshysy Úkimetke jaıly mektepterdi arnaıy basqarý júıesin engizýdi tapsyrdy.

Prezıdent óziniń Joldaýynda elimizdegi 1,3 myń mektepke kúrdeli jóndeý júrgizý qajet ekenin aıtty.

«Úkimet ákimdermen birge ony qarjylandyrý kózderin anyqtap, sonyń ishinde demeýshilerden de qarajat tartyp, 3 jyl ishinde bul mektepterdi tolyq jańartýy kerek», - dedi Qasym-Jomart Toqaev.